உதவி பேராசிரியர் மீது பொய் புகார் கொடுக்கப்பட்டுள்ளதாக பெரியார் பல்கலைக்கழக மாணவ-மாணவிகள் கலெக்டரிடம் மனு கொடுத்துள்ளனர்.
சேலம் மாவட்டத்தில் உள்ள பெரியார் பல்கலைக்கழகத்தில் பயிலும் வரலாற்றுத்துறை மாணவ-மாணவிகள் நேற்று கலெக்டர் அலுவலகத்திற்கு சென்று தங்களின் பல்கலைக்கழக உதவிப் பேராசிரியர் மீது மாணவி ஒருவர் பொய்யான புகாரை கொடுத்துள்ளதாக மாவட்ட கலெக்டர் கார்மேகத்திடம் மனு கொடுத்துள்ளனர். அவர்கள் அளித்த மனுவில் கூறியுள்ளதாவது, பல்கலைக்கழக உதவிப் பேராசிரியர் மீது மாணவி ஒருவர் பாலியல் புகாரை சூரமங்கலம் காவல் நிலையத்தில் கொடுத்துள்ள நிலையில் அங்கு அவர் மீது போலீசார் வழக்குப் பதிவு செய்துள்ளனர்.
மாணவி பேராசிரியர் மீது கொடுத்த புகார் பொய்யானது எனவும் உதவி பேராசிரியர் எந்த விதமான பாலியல் தொந்தரவுகளையும் மாணவிகளிடம் செய்ததில்லை. சில நபர்களின் தூண்டுதலால்தான் மாணவி பொய்யான புகாரை அளித்திருப்பதாகவும் இதுகுறித்து விசாரணை நடத்த வேண்டும் எனவும் பல்கலைகழகத்தில் சாதி பாகுபாடு அதிகமாக பார்க்க படுவதாகவும் கூறியுள்ளனர். மேலும் இது குறித்து உரிய உத்தரவை பிறப்பிக்க வேண்டும் என அதில் அவர்கள் கூறியுள்ளனர்.