மார்ச் 2-ஆம் தேதி 10, 11, 12ஆம் வகுப்பு மாணவர்களுக்கான பொதுத் தேர்வு அட்டவணையை பள்ளிக்கல்வித்துறை வெளியிட்டுள்ளது. அதன்படி பிளஸ் டூ மாணவர்களுக்கு பொது தேர்வு மே 5ஆம் தேதியும், பிளஸ் 1 பொதுத் தேர்வு மே 9ஆம் தேதியும், பத்தாம் வகுப்பு பொது தேர்வு மே 6ஆம் தேதி தொடங்குகிறது. மேலும் 10, 11, 12ஆம் வகுப்பு மாணவர்களுக்கான செய்முறைத் தேர்வு ஏப்ரல் 25ஆம் தேதி தொடங்கும் என ஏற்கனவே பள்ளிக்கல்வித்துறை அறிவிப்பு வெளியிட்டுள்ளது.
இந்த நிலையில் முதலில் 12ஆம் வகுப்பு மாணவர்களுக்கு செய்முறை தேர்வு வருகிற ஏப்ரல் 24ஆம் தேதி முதல் மே இரண்டாம் தேதி வரை நடைபெறும் என அரசுத் தேர்வுகள் இயக்ககம் தெரிவித்துள்ளது. அதனுடன் மே 4 ஆம் தேதிக்குள் பன்னிரண்டாம் வகுப்பு மாணவர்களுக்கான செய்முறைத் தேர்வு மதிப்பெண்களை முதன்மை கல்வி அலுவலகத்திற்கு அனுப்ப வேண்டும் என உத்தரவிடப்பட்டுள்ளது.
பிளஸ் 2 பொது தேர்வு மே 5ஆம் தேதி தொடங்கி 30-ம் தேதி நிறைவடைகிறது. இந்த நிலையில் தற்போது பிளஸ் 2 மாணவர்களுக்கான செய்முறைத் தேர்வு ஏப்ரல் 25 ஆம் தேதி தொடங்கி மே 2ஆம் தேதி வரை நடைபெறுகிறது. மேலும் இந்த தேதிக்குள் செய்முறை தேர்வை நடத்தி முடிக்க வேண்டும் என தேர்வுத்துறை உத்தரவு விட்டுள்ளது. இது தொடர்பாக வெளியிட்டுள்ள அறிக்கையில், 11ஆம் வகுப்பு பொது தேர்வு எழுதும் பொதுப்பிரிவு தொழிற்கல்வி பாடங்களுக்கான செய்முறை தேர்வுகள் ஏப்ரல் 25ஆம் தேதி முதல் மே 2-ஆம் தேதிக்குள் நடத்தி முடிக்க வேண்டும் என கூறப்பட்டிருக்கிறது.
அனைத்து செய்முறை தேர்வுகளும் முடிவுற்ற பின்னர், மதிப்பெண் பட்டியல்களை தலைமையாசிரியர்கள் சம்பந்தப்பட்ட முதன்மை கல்வி அலுவலகத்தில் ஒப்படைக்க வேண்டும். தேர்வு முடிவுகளை www.dge.tn.gov.in என்ற இணையதளத்தில் பதிவேற்றம் செய்ய வேண்டும் என தெரிவிக்கப்பட்டுள்ளது. 11 ஆம் வகுப்புக்கான பொதுதேர்வு 9 ஆம் தேதி தொடங்குகிறது.