தமிழகத்தில் கொரோனா காரணமாக கடந்த ஆண்டு பள்ளி மாணவர்களுக்கு நடைபெற இருந்த தேர்வுகள் அனைத்தும் ரத்து செய்யப்பட்டு அனைத்து வகுப்பு மாணவர்களும் தேர்வின்றி தேர்ச்சி பெறுவதாக அறிவிக்கப்பட்டது. தற்போது கொரோனா பாதிப்பு குறைந்த நிலையில் பள்ளிகள் அனைத்தும் திறக்கப்பட்டு நேரடி வகுப்புகள் நடந்து கொண்டிருக்கிறது. அதனால் மாணவர்களுக்கு கட்டாயம் தேர்வுகள் நடைபெறும் என பள்ளிக்கல்வித் துறை அறிவித்திருந்தது. அதன்படி பொதுத்தேர்வு அட்டவணை வெளியிடப்பட்டுள்ளது. அதுமட்டுமல்லாமல் பள்ளி அளவில் திருப்புதல் தேர்வு நடத்தப்பட்டு வருகிறது.
இந்நிலையில் தமிழகத்தில் 10,11,12 ஆம் வகுப்பு மாணவர்களுக்கு பள்ளி அளவிலேயே வினாத்தாள் தயாரித்து மூன்றாம் கட்ட திருப்புதல் தேர்வுகளை நடத்திக் கொள்ளலாம் என பள்ளிக் கல்வித்துறை உத்தரவிட்டுள்ளது. இதுதொடர்பாக அனைத்து மாவட்ட முதன்மை கல்வி அதிகாரிகளுக்கும் சுற்றறிக்கை அனுப்பப்பட்டுள்ளது. வினாத்தாள்களை சம்பந்தப்பட்ட ஆசிரியர்களை கொண்டு தயாரித்துக் கொள்ள வேண்டும். பள்ளி தலைமை ஆசிரியர்களுக்கு உரிய அறிவுறுத்தல்களை வழங்க வேண்டும் என அதில் கூறப்பட்டுள்ளது.