புதுக்கோட்டை மாவட்டத்தில் மின்னல் தாக்கி 3 பசுமாடுகள் உயிரிழந்தன.
புதுக்கோட்டை மாவட்டத்தில் கடந்த சில தினங்களாக வெயிலின் தாக்கம் அதிகரித்து வந்துள்ள நிலையில் நேற்று மாலை திடீரென்று அன்னவாசல், சித்தன்னவாசல், குடுமியான்மலை, இலுப்பூர், வயலோகம், முக்கண்ணாமலைப்பட்டி, காலாடிப்பட்டி, ஆரியூர், மாங்குடி உள்ளிட்ட இடங்களில் இடி, மின்னலுடன் கூடிய கனமழை பெய்தது.
இந்த மழை பெய்யும் போது காலாடிப்பட்டியில் வசித்துவந்த பெருமாள் என்பவருடைய சினை பசுமாடு, சித்திக் என்பவருடைய பசுமாடு மற்றும் இலுப்பூர் கரடி காடு பகுதியில் வசித்து வரும் மரியகிருஸ்டி என்பவருடைய சினை பசு மாடு ஆகிய மூன்று மாடுகளும் மின்னல் தாக்கி உயிரிழந்துள்ளன. மேலும் நார்த்தமலையில் திருவிழாவிற்கு வரவேற்க வைத்த பதாகைகள் அனைத்தும் காற்று அதிகமாக வீசியதால் கீழே சாய்ந்தது. இந்த மழையால் முக்கண்ணாமலைப்பட்டி, மதியநல்லூர், கீழக்குறிச்சி பகுதிகளில் வாரச்சந்தை பாதிக்கப்பட்டுள்ளது.