அடையாளம் தெரியாத வாகனம் மோதிய விபத்தில் சாலையில் நடந்து சென்ற வாலிபர் பலியான சம்பவம் சோகத்தை ஏற்படுத்தியுள்ளது.
திருநெல்வேலி மாவட்டத்திலுள்ள ஆவரைகுளம் புதூர் சாலையில் மனநலம் பாதிக்கப்பட்ட ஆகாஷ் என்பவர் வசித்து வந்துள்ளார். இவர் நள்ளிரவு நேரத்தில் பைபாஸ் ரோட்டில் நடந்து சென்றுள்ளார். அப்போது அவ்வழியாக வேகமாக சென்ற அடையாளம் தெரியாத வாகனம் ஆகாஷ் மீது பலமாக மோதியது. இந்த விபத்தில் படுகாயமடைந்த ஆகாஷ் சம்பவ இடத்திலேயே பரிதாபமாக இறந்துவிட்டார்.
இதுகுறித்து தகவல் அறிந்த காவல்துறையினர் சம்பவ இடத்திற்கு விரைந்து சென்று ஆகாஷின் சடலத்தை மீட்டு அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். மேலும் இதுகுறித்து வழக்குப்பதிவு செய்த காவல்துறையினர் விபத்தை ஏற்படுத்திய வாகனம் பற்றி விசாரணை மேற்கொண்டு வருகின்றனர்.