பயங்கர விபத்தில் பெண் காவலர் பரிதாபமாக உயிரிழந்த சம்பவம் சோகத்தை ஏற்படுத்தியுள்ளது.
கன்னியாகுமரி மாவட்டத்திலுள்ள மார்த்தாண்டம் அருகே கிராத்தூர் கிராமத்தில் கிரிஸ்டல் பாய் என்பவர் வசித்து வந்துள்ளார். இவர் கருங்கல் காவல்நிலையத்தில் ஏட்டாக பணியாற்றி வந்துள்ளார். இவருக்கு சைலன் என்ற கணவரும் ஒரு மகனும், மகளும் இருக்கின்றனர். இந்நிலையில் கிரிஸ்டல் பாய் பணி முடிந்து குழித்துறை மருத்துவமனைக்கு சொந்த வேலைக்காக இருசக்கர வாகனத்தில் சென்றுள்ளார். இவர் மார்த்தாண்டம் மேம்பாலத்தின் அருகே சென்று கொண்டிருந்தார். அப்போது பின்னால் வந்த குடிநீர் லாரி கிரிஸ்டல் பாயின் இருசக்கர வாகனத்தின் மீது பலமாக மோதியது.
அந்த விபத்தில் கிரிஸ்டல் பாய் சம்பவ இடத்திலேயே பரிதாபமாக உயிரிழந்தார். இதைப்பார்த்து அதிர்ச்சியடைந்த பொதுமக்கள் மார்த்தாண்டம் காவல்துறைக்கு தகவல் தெரிவித்துள்ளனர். அந்த தகவலின்படி சம்பவ இடத்திற்கு விரைந்து சென்ற காவல்துறையினர் கிரிஸ்டல் பாயின் உடலை மீட்டு பிரேத பரிசோதனைக்காக குழித்துறை அரசு மருத்துவமனைக்கு அனுப்பி வைத்துள்ளனர். மேலும் இதுகுறித்து வழக்குப்பதிவு செய்த காவல்துறையினர் லாரி ஓட்டுநர் பாபுவை கைது செய்து விசாரணை மேற்கொண்டு வருகின்றனர்.