பா.ஜனதா பிரமுகரின் காரை பெட்ரோல் ஊற்றி தீ வைத்த பெண் உள்பட 2 பேரை காவல்துறையினர் தீவிரமாக தேடி வருகின்றனர்.
சென்னை மாவட்டத்திலுள்ள மதுரவாயல் கிருஷ்ணா நகர் 1-வது தெருவில் பா. ஜனதா கட்சி பிரமுகரான சதீஷ் குமார் என்பவர் வசித்து வருகிறார். நேற்று முன்தினம் இரவு நேரத்தில் சதீஷ் குமாரின் வீட்டிற்கு முன்பு நிறுத்தி இருந்த கார் திடீரென தீப்பிடித்து எரிய ஆரம்பித்து. இதனை பார்த்ததும் அக்கம் பக்கத்தினர் உடனடியாக தண்ணீர் ஊற்றி காரில் பற்றி எரிந்த தீயை அணைத்தனர். ஆனால் காரின் முன்பகுதி முற்றிலும் எரிந்து நாசமானது.
இதுகுறித்து தகவல் அறிந்த காவல்துறையினர் சம்பவ இடத்திற்கு விரைந்து சென்று கண்காணிப்பு கேமரா காட்சிகளை ஆய்வு செய்தனர். அப்போது ஒரு ஆணுடன் வந்த இளம்பெண் சதீஷ்குமாரின் கார் மீது பெட்ரோலை ஊற்றி தீ வைத்து விட்டு அங்கிருந்து தப்பி செல்லும் காட்சிகள் பதிவாகியுள்ளது. அதன் அடிப்படையில் காவல்துறையினர் பல்வேறு கோணங்களில் விசாரணை மேற்கொண்டு வருகின்றனர்.