கடலில் மூழ்கி மீனவர் உயிரிழந்த சம்பவம் சோகத்தை ஏற்படுத்தியுள்ளது.
திருவாரூர் மாவட்டத்தில் உள்ள கீழவாடியக்காடு பகுதியில் மீனவரான சந்திரசேகரன் என்பவர் வசித்து வந்துள்ளார். இவருக்கு நித்யா என்ற மனைவி உள்ளார். இந்நிலையில் நேற்று சந்திரசேகரன் முன்னாங்காடு துறைமுகத்திலிருந்து மீனவர்களுடன் மேல கடைசி தீவு பகுதிக்கு மீன்பிடிக்க சென்றுள்ளார். அப்போது திடீரென சந்திரசேகரன் படகில் இருந்து தவறி கடலில் விழுந்துவிட்டார்.
இதனை பார்த்து அதிர்ச்சி அடைந்த மீனவர்கள் உடனடியாக கடலோர பாதுகாப்பு காவல்துறையினருக்கு தகவல் தெரிவித்துள்ளனர். அந்த தகவலின் படி சம்பவ இடத்திற்கு விரைந்து சென்ற காவல்துறையினர் நீண்ட நேரம் போராடி சந்திரசேகரனின் சடலத்தை கைப்பற்றி பிரேத பரிசோதனைக்காக அரசு மருத்துவமனைக்கு அனுப்பி வைத்துள்ளனர். மேலும் இது குறித்து வழக்கு பதிவு செய்த காவல்துறையினர் தீவிர விசாரணை மேற்கொண்டு வருகின்றனர். இந்த சம்பவம் அப்பகுதி மக்களிடையே பெரும் சோகத்தை ஏற்படுத்தியுள்ளது.