காங்கிரஸ் தலைவர் சோனியா காந்தியை அவருடைய இல்லத்தில் ராஜஸ்தான் மாநில முன்னாள் துணை முதல் மந்திரி சச்சின் பைலட் நேற்று சந்தித்து பேசினார். முன்னதாக காங்கிரஸ் ஆளும் ராஜஸ்தான் மாநில முதல் மந்திரி அசோக் கெலாட், சத்தீஷ்கார் மாநில முதல்-மந்திரி பூபேஷ் பாகல் போன்றோரை சோனியாகாந்தி நேற்று முன்தினம் அழைத்து பேசினார். இதையடுத்து இந்த சந்திப்பு நடந்துள்ளது.
அதுமட்டுமல்லாமல் காங்கிரசை வலுப்படுத்த தேர்தல் வியூக நிபுணர் பிரசாந்த் கிஷோர் வகுத்து கொடுத்த திட்டம் தொடர்பாக காங்கிரசில் ஆலோசனைகள் நடந்து வருகிறது. இச்சூழ்நிலையில் சோனியா காந்தியை, சச்சின்பைலட் சந்தித்து பேசினார் என்பது குறிப்பிடத்தக்கது. ஏற்கனவே இந்த மாத தொடக்கத்தில் ராகுல் காந்தி, பிரியங்கா போன்றோரை சச்சின் பைலட் சந்தித்து, கட்சிக்கு புத்துயிரூட்டுவது தொடர்பாக ஆலோசித்தார்.