நாடு முழுவதும் கடந்த சில நாட்களாக பெட்ரோல் மற்றும் டீசல் விலையை தொடர்ந்து மக்கள் அன்றாட வாழ்வில் பயன்படுத்தக்கூடிய அத்தியாவசிய பொருட்களின் விலையும் உயர்ந்துகொண்டே வருகிறது. இதனால் நடுத்தர மக்கள் பெரிதும் பாதிக்கப்பட்டுள்ளனர். அதிலும் குறிப்பாக சமையல் சிலிண்டர் எரிவாயு, உணவுப் பொருள்களின் விலை என நாளுக்கு நாள் ஒவ்வொரு பொருட்களும் விலை உயர்த்தப்பட்டு வருகிறது. தற்போது இந்திய மக்கள் அன்றாடம் பயன்படுத்தும் சோப்புகளின் விலை உயர உள்ளதாக அதிர்ச்சி தகவல் வெளியாகி உள்ளது.
இந்தியாவில் தயாரிக்கப்படும் சோப்புகளுக்கு முக்கிய உற்பத்தி பொருள் பாமாயில் எண்ணெய்.இந்தோனேசியாவில் இருந்து பாமாயில் ஏற்றுமதி நிறுத்தப்பட்டு உள்ளதால் தற்போது தட்டுப்பாடு ஏற்பட்டுள்ளது. இதனால் இந்துஸ்தான் யுனிலீவர் உள்ளிட்ட நிறுவனங்கள் சோப்பு விலையை உயர்த்த உள்ளன. அதேசமயம் பாமாயிலுக்கு பதில் மாற்றாக ஒன்றைத் தேடி வருகின்றனர். தற்போது சோப்பு விலை உயர்த்தப்பட உள்ளதாக வெளியாகியுள்ள தகவல் மக்கள் மத்தியில் பேரதிர்ச்சியை ஏற்படுத்தியுள்ளது