கண்டெய்னர் பெட்டிக்கு அடியில் சிக்கி அண்ணன் தங்கை இருவரும் உடல் நசுங்கி பலியான சம்பவம் பெரும் சோகத்தை ஏற்படுத்தியுள்ளது.
சென்னை மாவட்டத்தில் உள்ள வண்ணாரப்பேட்டை காலிங்கராயன் தெருவில் சீனிவாசன்(51) என்பவர் வசித்து வந்துள்ளார். இவர் அண்ணா நகரில் இருக்கும் கட்டுமான நிறுவனத்தில் மேற்பார்வையாளராக பணிபுரிந்து வந்துள்ளார். இவர் தனது சகோதரியான நிவேதா(45) என்பவருடன் மோட்டார் சைக்கிளில் கோவிலுக்கு சென்று விட்டு வண்ணாரப்பேட்டை நோக்கி வந்து கொண்டிருந்தார்.
இந்நிலையில் மணலி எம்.எப்.எல் ரவுண்டானா அருகே சென்று கொண்டிருந்த போது ஆண்டார்குப்பம் நோக்கி வேகமாக சென்ற கண்டெய்னர் லாரி மற்றொரு லாரி மீது மோதியது. இதனால் கண்டெய்னர் பெட்டி நடுரோட்டில் கவிழ்ந்து சீனிவாசனின் மோட்டார் சைக்கிள் மீது விழுந்தது. இதனால் கண்டெய்னர் பெட்டிக்கு அடியில் சிக்கி சீனிவாசன், நிவேதா ஆகிய இருவரும் சம்பவ இடத்திலேயே உடல் நசுங்கி பரிதாபமாக இறந்தனர்.
இதுகுறித்து தகவல் அறிந்த காவல்துறையினர் சம்பவ இடத்திற்கு விரைந்து சென்று 2 பேரின் சடலங்களையும் கைப்பற்றி அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். மேலும் இதுகுறித்து வழக்குப்பதிவு செய்த காவல்துறையினர் தப்பியோடிய லாரி ஓட்டுநரை தீவிரமாக தேடி வருகின்றனர்.