இரத்தம் வடிந்த நிலையில் கிடந்த சடலம்…. தந்தையின் பரபரப்பு புகார்…. போலீஸ் விசாரணை…!!

முன்னாள் ராணுவ வீரர் மர்மமான முறையில் இறந்து கிடந்த சம்பவம் குறித்து காவல்துறையினர் விசாரணை மேற்கொண்டு வருகின்றனர்.

விருதுநகர் மாவட்டத்திலுள்ள ஆசிலாபுரம் கிராமத்தில் பெருமாள் என்பவர் வசித்து வருகிறார். இவருக்கு முன்னாள் ராணுவ வீரரான சுப்புராம்(51) என்ற மகன் இருந்துள்ளார். இந்நிலையில் கருத்து வேறுபாடு காரணமாக சுப்புராமின் மனைவி அவரை விட்டு பிரிந்து சென்றுவிட்டார். நேற்று சுப்புராம் வீட்டிற்குள் இறந்து கிடப்பதாக பெருமாளுக்கு தகவல் கிடைத்தது. அந்த தகவலின்படி பெருமாள் அங்கு சென்று பார்த்த போது தனது மகன் மூக்கு மற்றும் வாயில் இரத்தம் வடிந்த நிலையில் சடலமாக கிடப்பதை பார்த்து அதிர்ச்சி அடைந்தார்.

இதுகுறித்து தகவல் அறிந்த காவல்துறையினர் சம்பவ இடத்திற்கு விரைந்து சென்று சுப்புராமின் சடலத்தை கைப்பற்றி அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். இதனையடுத்து தனது மகனின் இறப்பில் சந்தேகம் இருப்பதாக பெருமாள் காவல் நிலையத்தில் புகார் அளித்துள்ளார். அந்த புகாரின் பேரில் வழக்குப்பதிவு செய்த காவல்துறையினர் விசாரணை மேற்கொண்டு வருகின்றனர்.