லாரி மீது பேருந்து மோதிய விபத்தில் 15 பேர் காயமடைந்த சம்பவம் பரபரப்பை ஏற்படுத்தியுள்ளது.
மதுரை மாவட்டத்தில் இருந்து 40 பயணிகளை ஏற்றிக்கொண்டு நேற்று முன்தினம் அரசு பேருந்து கடலூர் நோக்கி சென்று கொண்டிருந்தது. இந்நிலையில் புதுக்கோட்டை மாவட்டத்திலுள்ள விராலிமலை வானதிராயன்பட்டி பிரிவு சாலை அருகே சென்று கொண்டிருந்தபோது முன்னால் சென்ற லாரி மீது பேருந்து எதிர்பாராதவிதமாக மோதியது. இந்த விபத்தில் பானுமதி, சகாயராணி உள்பட 15 பேர் காயமடைந்தனர்.
இதுகுறித்து தகவல் அறிந்த காவல்துறையினர் சம்பவ இடத்திற்கு விரைந்து சென்று காயமடைந்த 15 பேரையும் மீட்டு அரசு மருத்துவமனையில் சிகிச்சைக்காக அனுமதித்துள்ளனர். அங்கு அவர்களுக்கு தீவிர சிகிச்சை அளிக்கப்பட்டு வருகிறது. இது குறித்து வழக்குப்பதிவு செய்த காவல்துறையினர் விசாரணை மேற்கொண்டு வருகின்றனர்.