லோகேஷ் கனகராஜ் இயக்கத்தில் உருவான திரைப்படம் விக்ரம். கமலஹாசன் கதாநாயகனாக நடிக்கும் இந்த படத்தில் விஜய் சேதுபதி, பகத் பாஸில், அர்ஜுன் தாஸ், காளிதாஸ் ஜெயராம் உள்ளிட்ட பல நடிகர்கள் நடித்துள்ளனர். இதில் சூர்யா கௌரவ வேடத்தில் நடித்துள்ளார். இதனை கமலஹாசன் தனது சொந்த தயாரிப்பு நிறுவனமான ராஜ்கமல் நிறுவனம் மூலம் தயாரிக்கின்றனர். அனிருத் இசையமைக்கும் இப்படத்திற்கு கங்காதரன் ஒளிப்பதிவு செய்துள்ளார். விக்ரம் திரைப்படம் வரும் ஜூன் 3-ம் தேதி திரையரங்குகளில் வெளியாக உள்ளது. இந்தப் படத்தின் டிரைலர் மற்றும் பாடல்கள் வெளியாகி ரசிகர்கள் மத்தியில் பெரும் எதிர்பார்ப்பை உருவாக்கியுள்ளது.
விக்ரம் படத்தின் டிரைலரை உலகின் மிக உயரமான கட்டிடம் துபாயில் உள்ள புர்ஜ் கலீபா கட்டிடத்தில் மிகப்பெரிய திரையில் இன்று இரவு 8.10 மணிக்கு திரையிட திட்டமிட்டு உள்ளனர். மேலும் விக்ரம் படத்தில் சூர்யாவின் பர்ஸ்ட் லுக் போஸ்டரை லோகேஷ் கனகராஜ் தனது சமூக வலைதளப் பக்கத்தில் பகிர்ந்துள்ளார். இதனுடன் சூர்யாவுக்கு நன்றி தெரிவித்து லோகேஷ் கனகராஜ் இந்த போஸ்டரை வெளியிட்டுள்ளார். தற்போது இந்த போஸ்டர் சமூக வலைத்தளங்களில் வைரலாகி வருகிறது .