விஷம் வைத்து ஆடுகளை கொன்ற நபர்கள் குறித்து காவல்துறையினர் விசாரணை நடத்தி வருகின்றனர்.
திருநெல்வேலி மாவட்டத்திலுள்ள சத்திரம் புதுக்குளம் பகுதியில் கோபால் என்பவருக்கு சொந்தமான தோட்டம் அமைந்துள்ளது. இந்த தோட்டத்தில் பெருமாள், சப்பானி ஆகியோருக்கு சொந்தமான ஆடுகளும், ராஜ் என்பவருக்கு சொந்தமான மாடுகளும் மேய்ந்து கொண்டிருந்தது. இந்நிலையில் திடீரென ஆடு, மாடுகள் வாயில் நுரை தள்ளியபடி மயங்கி விழுந்ததை பார்த்து அதன் உரிமையாளர்கள் அதிர்ச்சி அடைந்தனர். இதுபற்றி நெல்லை கால்நடை மருத்துவக் கல்லூரி மருத்துவர்களுக்கு தகவல் தெரிவிக்கப்பட்டது. பின்னர் மருத்துவர்கள் சம்பவ இடத்திற்கு விரைந்து சென்று மாடுகள் மற்றும் ஆடுகளுக்கு சிகிச்சை அளித்துள்ளனர்.
ஆனாலும் சிகிச்சை பலனின்றி 9 ஆடுகள் பரிதாபமாக உயிரிழந்தது. இதனையடுத்து உயிருக்கு போராடிக் கொண்டிருந்த 6 மாடுகளுக்கு மருத்துவர்கள் சிகிச்சை அளித்தனர். இதுகுறித்து தச்சநல்லூர் காவல் நிலையத்தில் புகார் அளிக்கப்பட்டது. அந்த புகாரின் பேரில் வழக்குப்பதிவு செய்த காவல்துறையினர் விஷம் வைத்து ஆடு மாடுகளை யார் கொன்றார்கள் என்பது குறித்து விசாரணை நடத்தி வருகின்றனர்.