ஓடும் லாரியிலிருந்து கழன்ற டயர் மோதி ஆட்டோ ஓட்டுநர் பலியான சம்பவம் பெரும் சோகத்தை ஏற்படுத்தியுள்ளது.
சென்னை, காஞ்சிபுரம் மாவட்டம் படப்பையில் உள்ள கீழ்படப்பையை சேர்ந்தவர் ஆட்டோ ஓட்டுநர் முரளி(51). இவர் கடந்த ஒன்றாம் தேதி படப்பை பஜார் பகுதியில் ரோட்டின் ஓரம் நடந்து சென்று கொண்டிருந்தபோது வண்டலூர் – வாலாஜாபாத் சாலையில் வேகமாக வந்த ஒரு லாரியின் பின்பக்க டயர் திடீரென்று கழன்றது. அந்த டயர் நடந்து சென்ற முரளி மீது மோதியது. இந்த விபத்தில் தூக்கி வீசப்பட்ட முரளி படுகாயமடைந்தார். உடனே அருகில் இருந்தவர்கள் அவரை மீட்டு சென்னை ராஜீவ்காந்தி அரசு மருத்துவமனையில் சேர்த்துள்ளனர். ஆனால் அங்கு சிகிச்சை பலனின்றி கடந்த 5-ம் தேதி முரளி பரிதாபமாக இறந்தார்.
இந்நிலையில் ஓடும் லாரியிலிருந்து கழன்று ஓடிவந்த டயர் முரளி மீது மோதி தூக்கி வீசப்பட்ட காட்சி அங்குள்ள சிசிடிவி கேமராவில் பதிவாகி இருந்தது. இந்த வீடியோ காட்சி தற்போது சமூக வலைத்தளங்களில் வைரலாக பரவி வருகிறது. இந்த விபத்து குறித்து தாம்பரம் போக்குவரத்து புலனாய்வு காவல்துறையினர் வழக்குப் பதிந்து விசாரணை மேற்கொண்டு வருகின்றனர்.