மோட்டார் சைக்கிள் திருடிய நபரை காவல்துறையினர் கைது செய்துள்ளனர்.
கோயமுத்தூர் மாவட்டத்தில் உள்ள அரசு மருத்துவமனையில் கடந்த சில நாட்களாக 15-க்கும் மேற்பட்ட மோட்டார் சைக்கிள்கள் திருட்டு போனது. இதுகுறித்து மருத்துவமனை ஊழியர்கள் காவல் நிலையத்தில் புகார் அளித்தனர். இந்நிலையில் நேற்று அரசு மருத்துவமனை வளாகத்தில் ஒரு நபர் மோட்டார் சைக்கிளை எடுக்க முயன்றுள்ளார். அதனை பார்த்த மருத்துவமனை காவலாளி சரவணன் அந்த நபரை அழைத்து விசாரணை செய்துள்ளார்.
அந்த விசாரணையில் அவர் செல்லபுரம் பகுதியை சேர்ந்த காதர் அலி என்பதும், மருத்துவமனையில் மோட்டார் சைக்கிள்களை திருடும் கும்பலை சேர்ந்தவர் என்பதும் தெரியவந்துள்ளது. இதுகுறித்து வழக்குப்பதிவு செய்த காவல்துறையினர் காதர் அலியை கைது செய்து விசாரணை நடத்தி வருகின்றனர். இந்நிலையில் குற்றவாளியை கண்டுபிடித்த மருத்துவமனை காவலாளியை பொதுமக்கள் பாராட்டி வருகின்றனர்.