தமிழக மாணவர்களுக்கான கற்றல் இடைவெளியை குறைக்க கூடிய வகையில் ‘எண்ணும் எழுத்து திட்டம்’ தொடங்கப்படுகிறது. இந்தத் திட்டத்திற்காக 30 ஆயிரம் ஆசிரியர்களுக்கு மாவட்ட ஆசிரியர் பயிற்சி நிறுவனம் மூலம் பயிற்சி அளிக்கப்பட்டு வருகிறது. தமிழகம் முழுவதும் இன்று முதல் கோடை விடுமுறை முடிந்து பள்ளிகள் திறக்கப்பட்டு உள்ளது. இந்நிலையில் திருவள்ளூர் அழிஞ்சிவாக்கம் ஊராட்சி ஒன்றிய நடுநிலைப் பள்ளியில் காலை 10 மணிக்கு முதல்வர் மு.க.ஸ்டாலின் ‘எண்ணும் எழுத்து’ திட்டத்தை தொடங்கி வைத்துள்ளார். அதன் பிறகு பேசிய அவர், ‘எண்ணும் எழுத்தும் கண்ணென தகும்’ என ஔவையார் பாடலை மேற்கோள் காட்டி உரையாற்றினார். தாகத்தை தீர்க்கும் நீர்போல கல்வி தாகத்தை தீர்க்க எண்ணும் எழுத்தும் திட்டம் தொடங்கப்பட்டுள்ளது.
இந்தத் திட்டம் மூலம் குழந்தைகளின் எதிர்காலம் ஏற்றமடையும், ஆசிரியர்களின் கருத்து கேட்கப்பட்டு எண்ணும் எழுத்தும் திட்டம் வடிவமைக்கப்பட்டுள்ளது. அதனைத் தொடர்ந்து எளிமையான வகையில் பயிற்சி வகுப்புகள் உருவாக்கப்பட்டுள்ளது. தொடக்க கல்வி என்பது சமூகத்தின் திறவுகோல் 8 வயதுக்கு உட்பட்ட அனைத்து குழந்தைகளும் எண்ணறிவு, எழுத்தறிவு பெற வேண்டும் என்பதே நோக்கம் என்று அவர் தெரிவித்துள்ளார். மேலும் இந்த திட்டம் தொடர்பான வீடியோ, கைபேசி செயலி, திட்டப்பாடல் ஆகியவற்றை வெளியிட்டார். ஆசிரியர் கையேடு, சான்றிதழ், கற்பித்தல் உபகரணம், மற்றும் புத்தகங்கள் ஆகியவற்றை ஸ்டாலின் வழங்கினார்.