நகராட்சி கவுன்சிலரை பெயிண்டர் கத்தியால் வெட்டிய சம்பவம் பரபரப்பை ஏற்படுத்தியுள்ளது.
திருப்பத்தூர் மாவட்டத்தில் உள்ள சிவராஜ்பேட்டை பகுதியில் வெற்றிகொண்டான் என்பவர் வசித்து வருகிறார். இவர் விடுதலை சிறுத்தைகள் கட்சியை சேர்ந்தவராவார். தற்போது வெற்றிகொண்டான் 36-வது வார்டு கவுன்சிலராக இருக்கிறார். இவரது வீட்டிற்கு அருகே பெயிண்டரான முரளியும், அவருடன் வந்த மூன்று நபர்களும் இணைந்து முன்னாள் ஊராட்சி மன்ற தலைவர் பிரபு என்பவரை சரமாரியாக தாக்கியுள்ளனர். இதனை பார்த்த வெற்றிகொண்டான் அவர்களை தட்டிக் கேட்டுள்ளார்.
அப்போது முரளி தான் மறைத்து வைத்திருந்த கத்தியால் வெற்றிகொண்டானின் தலையில் சரமாரியாக வெட்டியுள்ளார். இதனால் காயமடைந்த அவரை அக்கம் பக்கத்தில் இருந்தவர்கள் மீட்டு மருத்துவமனையில் சிகிச்சைக்காக அனுமதித்தனர். இதுகுறித்த புகாரின்பேரில் வழக்குப்பதிவு செய்த காவல்துறையினர் முரளியை கைது செய்து சிறையில் அடைத்தனர். மேலும் தப்பி ஓடிய 3 பேரை காவல்துறையினர் தீவிரமாக தேடி வருகின்றனர்.