விமானங்களுக்கு பயன்படுத்தக்கூடிய ஏடிஎஃப் எரிபொருளின் விலை 16 சதவீதம் உயர்த்தப்பட்டுள்ளது. இந்த விலை உயர்வு இன்று முதல் அமலுக்கு வந்துள்ளது. கடந்த ஜூன் 1-ஆம் தேதி இதன் விலை 1.3 சதவீதம் குறைக்கப்பட்டது. தற்போது இதன் விலை 16 சதவீதம் உயர்த்தப்பட்டுள்ளது. இதன் விளைவாக எரிபொருள் விலை வரலாறு காணாத அளவிற்கு உயர்ந்துள்ளது. அதனால் விமான டிக்கெட் கட்டணம் உயரும் என எதிர்பார்க்கப்படுகிறது.
இன்று முதல் சென்னையில் ஒரு கிலோ லிட்டர் ஏடிஎஃப் 146,215.85 ரூபாய்க்கு விற்பனை செய்யப்பட்டு வருகிறது. மேலும் மும்பையில் ஒரு கிலோ லிட்டர் 140,092.74 ரூபாய்க்கு விற்பனை செய்யப்படுகிறது. மேலும் இந்தியன் ஆயில், இந்துஸ்தான் பெட்ரோலியம், பாரத் பெட்ரோலியம், ரிலையன்ஸ் ஆகிய நிறுவனங்கள் விமான நிறுவனங்களுக்கு ஏடிஎஃப் வினியோகித்து வருவது குறிப்பிடத்தக்கது. இந்த விலை உயர்வு காரணமாக விரைவில் விமான டிக்கெட் கட்டணம் உயரும் என்று வெளியாகியுள்ள தகவல் விமான பயணிகள் மத்தியில் பெரும் அதிர்ச்சியை ஏற்படுத்தியுள்ளது.