கூட்டுறவு மார்க்கெட்டிங் சொசைட்டியில் வியாபாரிகள் வராததால் பருத்தி விவசாயிகள் ஏமாற்றம் அடைந்தனர்.
மயிலாடுதுறை மாவட்டத்தில் வாரந்தோறும் சனிக்கிழமையன்று ஒழுங்குமுறை விற்பனை கூடம் மற்றும் கூறைநாடு பெரியசாலியத் தெரு உள்ள கூட்டுறவு மார்க்கெட்டிங் சொசைட்டியில் தனியார் வியாபாரிகள் பருத்தி கொள்முதல் செய்வார்கள். இந்நிலையில் நேற்று விற்பனை கூட குடோனில் இடமில்லாததால் பருத்தி கொள்முதல் நடக்காது என முன்கூட்டியே அறிவிக்கப்பட்டிருந்தது.
இதனால் விவசாயிகள் கூறைநாடு பெரியசாலிய தெருவில் இருக்கும் கூட்டுறவு மார்க்கெட்டிங் சொசைட்டிக்கு சென்று கேட்டபோது சனிக்கிழமை வியாபாரிகள் வந்தால் பருத்தி ஏலம் நடக்கும் என தெரிவித்தார்கள். இதனால் 500க்கும் மேற்பட்ட விவசாயிகள் நேற்று பருத்தி பஞ்சு மூட்டைகளை ஏற்றிக்கொண்டு மார்க்கெட்டிங் சொசைட்டிக்கு வந்து காத்திருந்தார்கள். ஆனால் மாலை 4 மணிவரையிலும் வியாபாரிகள் யாரும் வராததால் விவசாயிகள் ஏமாற்றம் அடைந்தார்கள். மேலும் அந்த குடோனில் பஞ்சு மூட்டைகளை அடுக்க இடம் இல்லாததால் விவசாயிகள் சாலையோரங்களில் பஞ்சு மூட்டைகளை அடுக்கி வைத்தனர்.