இயக்குனர் லோகேஷ் கனகராஜ் இயக்கத்தில் நடிகர் கமல்ஹாசன் நடித்த “விக்ரம்” படம் கடந்த 3ஆம் தேதி திரையரங்குகளில் வெளியாகியது. விஜய்சேதுபதி, பகத் பாசில், சூர்யா என திரைப் பிரபலங்கள் பலர் நடித்துள்ள இப்படத்திற்கு அனிருத் இசையமைத்துள்ளார். இந்த படம் ரசிகர்களிடம் நல்ல வரவேற்பை பெற்று வருகிறது. இத்திரைப்படம் வெளியாவதற்கு முன்பே இப்படத்தின் பாடல்கள் ரசிகர்களிடம் பெரும் வரவேற்பை பெற்றது.
எனினும் மிகவும் எதிர்பார்க்கப்பட்ட பத்தல.. பத்தல.. பாடலில் இடம் பெற்றிருந்த அரசியல் வரிகள் ஒன்றிய அரசை விமர்சிக்கும் வகையில் உள்ளது என பல கண்டனங்கள் எழுந்ததன் காரணமாக படத்தில் இடம்பெறாமல் நீக்கப்பட்டது. இருப்பினும் இந்த பாடலின் லிரிக்கல் வீடியோ இணையத்தில் ரசிகர்களால் அதிகளவில் பார்க்கப்பட்டுள்ளது. இந்த நிலையில் இப்படத்தின் வீடியோ பாடல் நாளை மாலை 6 மணிக்கு வெளியாகும் என்று படக்குழு வீடியோ ஒன்றை வெளியிட்டு அறிவித்துள்ளது. இதன் காரணமாக ரசிகர்கள் பெரும் உற்சாகத்தில் இருக்கின்றனர்.
