மீனவர்களின் வலையில் சிக்கிய ராட்சத சுறா மீன்கள் 1 லட்சத்து 10 ஆயிரம் ரூபாய்க்கு ஏலம் போனது.
கன்னியாகுமரி மாவட்டத்தில் உள்ள சின்ன முட்டம் மீன்பிடி துறைமுகத்திலிருந்து நேற்று முன்தினம் சூறாவளி காற்று வீசியதால் குறைந்த அளவிலான மீனவர்கள் கடலுக்கு சென்றனர். இதனை அடுத்து சூறாவளி காற்று பலமாக வீசியதால் விரைவாக மீனவர்கள் கரை திரும்பினர். இந்நிலையில் ஒரு படகில் இருந்த மீனவர்களின் வலையில் 200 மற்றும் 300 கிலோ எடை கொண்ட சுறா மீன்கள் சிக்கியது.
இதனை அடுத்து ராட்சத கிரேன் மூலம் மீனவர்கள் சுறா மீன்களை ஏல கூடத்திற்கு எடுத்து சென்றுள்ளனர். அங்கு 300 கிலோ எடை கொண்ட சுறா மீன் 60 ஆயிரம் ரூபாய்க்கு ஏலம் போனது. மேலும் 200 கிலோ எடை கொண்ட மீன் 50 ஆயிரம் ரூபாய்க்கு ஏலம் போனது. மீன்பிடி தடைக்காலம் முடிந்த பிறகு இப்போது தான் பெரிய மீன் சிக்கியதாக மீனவர்கள் மகிழ்ச்சியுடன் தெரிவித்துள்ளனர்.