கட்டுப்பாட்டை இழந்த கார் தலைகீழாக கவிழ்ந்த விபத்தில் 4 பேர் அதிர்ஷ்டவசமாக உயிர் தப்பினர்.
கோயம்புத்தூர் மாவட்டத்தில் உள்ள சிவானந்தபுரத்தில் ராமராஜ் என்பவர் வசித்து வருகிறார். இவருக்கு சரவணன்(58) என்ற மகன் உள்ளார். இந்நிலையில் சரவணன் தனது மனைவி, உறவினர் பெண் மற்றும் அவரது மகள் ஆகியோருடன் ஊட்டிக்கு காரில் சுற்றுலா சென்றுள்ளார். இவர்கள் ஊட்டியில் உள்ள அனைத்து இடங்களையும் சுற்றி பார்த்துவிட்டு கோத்தகிரி வழியாக கோவைக்கு காரில் புறப்பட்டனர். அப்போது லேசான மழை பெய்தது. இந்நிலையில் ஊட்டியில் இருந்து கோத்தகிரி செல்லும் சாலையில் கடைவீதி அருகே சென்ற போது ஓட்டுநரின் கட்டுப்பாட்டை இழந்த கார் சாலையோர பாறை மீது மோதி தலைகீழாக கவிழ்ந்து விபத்துக்குள்ளானது.
அப்போது பாதுகாப்பு ஏர் பேக்குகள் உடனடியாக விரிந்ததால் காரில் இருந்தவர்கள் காயமின்றி அதிர்ஷ்டவசமாக உயிர் தப்பினர். அவர்களை அவ்வழியாக சென்ற வாகன ஓட்டிகள் பத்திரமாக மீட்டனர். இதனை அடுத்து விபத்துக்குள்ளான கார் கிரேன் மூலம் அப்புறப்படுத்தப்பட்டது. இதனால் அப்பகுதியில் சிறிது நேரம் போக்குவரத்து பாதிக்கப்பட்டது. இந்த விபத்து குறித்து வழக்கு பதிவு செய்த கோத்தகிரி போலீசார் விசாரணை நடத்தி வருகின்றனர்.