சென்னை மாநகராட்சி மணலி மண்டலத்தில் தனியார் நிறுவனத்துடன் இணைந்து குப்பைகளை தரம் பிரிக்கும் போட்டி துவக்க விழா நிகழ்ச்சி இன்று நடந்தது. அந்த நிகழ்ச்சியில் மாநகராட்சி மேயர் பிரியா கலந்துகொண்டு, “என் குப்பை எனது பொறுப்பு”என்ற தலைப்பில் குப்பையை தரம் பிரிக்கும் சவால் என்ற போட்டியின் அறிவிப்பு பலகையை திறந்து வைத்தார். அதன் பிறகு தனது வீட்டில் மக்கும் குப்பை, மக்கா குப்பை என தரம் பிரித்த தனது புகைப்படங்களை இந்த போட்டியின் இணையதள செயலியில் பதிவிட்டுஉறுதிமொழி எடுத்தார்.
மேலும் இந்த போட்டி ஜூலை 9ஆம் தேதி முதல் ஆகஸ்ட் மாதம் 8-ம் தேதி வரை நடைபெறுகிறது.குப்பையை தரம் பிரித்து தரும் போட்டியில் சென்னை மாநகராட்சிக்கு உட்பட்ட பகுதியில் வசிக்கும் பொதுமக்கள் அனைவரும் கலந்து கொண்டு தங்கள் வீட்டிலேயே குப்பைகளையும் மக்கும் குப்பை மக்கா குப்பை என இரண்டு கூடைகளில் பிரித்துக் கொடுக்க வேண்டும்.
அதனை புகைப்படம் எடுத்து பேஸ்புக் மற்றும் இன்ஸ்டாகிராம் போன்ற சமூக வலைத்தளங்களில் வெளியிட்டு 8925800864 என்ற எண்ணிற்கு மிஸ்டு கால் கொடுக்க வேண்டும். அதே எண்ணில் வாட்ஸ் அப்பில் இல்லத்தரசிகள் பதிவு செய்தால் அவர்களை குலுக்கல் முறையில் தேர்வு செய்து முதல் மூன்று பேருக்கு டிவி, வாஷிங் மெஷின், பிரிட்ஜ் உள்ளிட்ட பரிசு பொருட்கள் வழங்கப்படும் என்று அறிவிக்கப்பட்டுள்ளது.