திருச்சி மற்றும் காரைக்குடி முன்பதிவில்லா சிறப்பு ரயில் இன்று(ஜூலை 10) முதல் இயக்கப்படும் என்று தெற்கு ரயில்வே அறிவித்துள்ளது. தமிழகத்தில் கொரோனா காரணமாக நிறுத்தி வைக்கப்பட்டிருந்த ரயில் சேவைகள் அனைத்தும் தற்போது மீண்டும் இயக்கப்பட்டு வருகின்றன. அவ்வகையில் திருச்சி -காரைக்குடி முன்பதிவு இல்லா சிறப்பு ரயில் இன்று முதல் இயக்கப்படுகிறது. திருச்சி -காரைக்குடி சிறப்பு ரயில் (06887) மற்றும் காரைக்குடி -திருச்சி சிறப்பு ரயில் (06888) ஜூலை 18 மற்றும் 19 ஆம் தேதி முதல் மீண்டும் இயக்கப்படும் என அறிவிக்கப்பட்டிருந்தது.
தற்போது பயணிகளின் வசதிக்காக இந்த ரயில்களை முன்கூட்டியே இயக்குவதற்கு தெற்கு ரயில்வே முடிவு செய்தது. அதன்படி திருச்சி மற்றும் காரைக்குடி முன்பதிவு இல்லாத சிறப்பு ரயில் மற்றும் காரைக்குடி -திருச்சி முன்பதிவில்லா சிறப்பு ரயில் ஜூலை 10 மற்றும் 11 ஆகிய தேதிகள் முதல் இயக்கப்படும் என அறிவிக்கப்பட்டுள்ளது. மேலும் திருச்சி -காரைக்குடி ரயில் சனிக்கிழமைகளிலும், காரைக்குடி-திருச்சியில் ஞாயிற்றுக்கிழமைகளிலும் இயக்கப்பட மாட்டாது என தெற்கு ரயில்வே தெரிவித்துள்ளது.