குளிப்பதை வீடியோ எடுத்ததாக கூறி வாலிபர் மிரட்டியதால் மாணவி தற்கொலைக்கு முயன்ற சம்பவம் பரபரப்பை ஏற்படுத்தியுள்ளது.
விழுப்புரம் மாவட்டத்திலுள்ள கண்டாச்சிபுரம் போலீஸ் சரகத்திற்கு உட்பட்ட பகுதியில் 18 வயது இளம்பெண் ஒருவர் வசித்து வருகிறார். இவர் விழுப்புரத்தில் உள்ள தனியார் கல்லூரியில் முதலாம் ஆண்டு படித்து வருகிறார். இந்நிலையில் உளுந்தூர்பேட்டை பகுதியில் வசிக்கும் சுதாகர் என்பவர் மாணவி கல்லூரிக்கு சென்று வரும்போது தொந்தரவு கொடுத்து வந்துள்ளார். மேலும் சுதாகர் மாணவியிடம் வழிமறித்து ‘நீ குளிக்கும்போது வீடியோ எடுத்து வைத்திருக்கிறேன், நான் சொல்வதை கேட்காவிட்டால் வீடியோவை சமூக வலைத் தளங்களில் வெளியிடுவேன்’ என கூறி மிரட்டியுள்ளார்.
இதனால் பயந்து போன மாணவி விஷம் குடித்துள்ளார். இதனை பார்த்த அக்கம் பக்கத்தினர் மாணவியை உடனடியாக மீட்டு முண்டியம்பாக்கம் அரசு மருத்துவக்கல்லூரி மருத்துவமனையில் சிகிச்சைக்காக அனுமதித்தனர். அங்கு அந்த மாணவிக்கு மருத்துவர்கள் சிகிச்சை அளித்து வருகின்றனர். இது குறித்த புகாரின் பேரில் சுதாகர் மீது வழக்கு பதிவு செய்த கண்டாச்சிபுரம் காவல்துறையினர் விசாரணை மேற்கொண்டு வருகின்றனர்.