உலக அளவில் தகவல்களை பரிமாறிக் கொள்ள உதவும் முதன்மையான செயலியாக வாட்ஸ் அப் உள்ளது. எனவே உலகம் முழுவதும் பில்லியன் கணக்கிலான மக்கள் வாட்ஸ் அப்பை பயன்படுத்தி வருகின்றனர். இதில் வெறும் குறுச்செய்திகள் மட்டுமின்றி, வீடியோ, வாய்ஸ், டெக்ஸ்ட் சேட் உள்ளிட்ட பல்வேறு வசதிகள் மற்றும் தனிநபர் மட்டுமல்லாது குழுவிலும் செய்திகளை பரிமாறிக்கொள்ளும் வசதிகள் உள்ளது.
வாட்ஸ்அப் நிறுவனம் அவ்வப்போது புதுப்புது வசதிகளை தன்னுடைய வாடிக்கையாளர்களுக்கு அறிமுகம் செய்து வருகிறது. இந்நிலையில் வாட்ஸ்ஆப் செயலியில் வாய்ஸ் நோட்டுகளை ஸ்டேட்டஸாக வைக்கும், ‘வாய்ஸ் ஸ்டேட்டஸ்’ அம்சம் விரைவில் அறிமுகம் செய்யப்படவுள்ளது. பயனர்கள், ஸ்டேட்டஸ் டேப்பின் கீழே தரப்படவுள்ள புதிய ஐகானை கிளிக் செய்து. வாய்ஸ் நோட்டுகளை ஸ்டேட்டஸாக வைத்துக்கொள்ளலாம். இந்த மாத இறுதியில் பீட்டா பயனர்களுக்கு பரிசோதனை முறையில் வழங்கப்படவுள்ள இந்த அம்சம், விரைவில் அனைத்து பயனர்களுக்கும் அறிமுகம் செய்யப்படவுள்ளது.