மரத்தில் கார் மோதிய விபத்தில் தந்தை-மகன் இருவரும் பரிதாபமாக உயிரிழந்த சம்பவம் சோகத்தை ஏற்படுத்தியுள்ளது.
ஈரோடு மாவட்டத்திலுள்ள குட்டைக்காடு பகுதியில் விவசாயியான விவேகானந்தன் என்பவர் வசித்து வந்துள்ளார். இவருக்கு ஆதித்யா என்ற மகன் இருந்துள்ளார். இவர் பன்னிரண்டாம் வகுப்பு சிபிஎஸ்சி தேர்வு எழுதியுள்ளார். இந்நிலையில் காங்கேயத்திற்கு விவேகானந்தனும், ஆதித்யாவும் வந்துள்ளனர். அதன்பின் காரில் காங்கேயம்-சென்னிமலை சாலை வழியாக வீட்டிற்கு திரும்பிக் கொண்டிருந்தனர். காரை விவேகானந்தன் வேகமாக ஓட்டிச் சென்றுள்ளார். காரின் இடது இருக்கையில் ஆதித்யா அமர்ந்திருந்தார். இந்நிலையில் காங்கேயம்-சென்னிமலை சாலையில் சென்று கொண்டிருந்தபோது கட்டுப்பாட்டை இழந்த கார் சாலையோரத்தில் இருந்த மரத்தில் மோதியது.
இந்த விபத்தில் இடிபாடுகளுக்குள் சிக்கிஇருந்த தந்தை-மகன் இருவரும் பலத்த காயமடைந்தனர். இதனை பார்த்த அக்கம் பக்கத்தில் உள்ளவர்கள் இருவரையும் உடனடியாக மீட்டு காங்கேயம் அரசு மருத்துவமனைக்கு சிகிச்சைக்காக அனுமதித்தனர். இதனைத் தொடர்ந்து கார் தீப்பற்றி எரிந்தது. அங்கு விவேகானந்தனை பரிசோதனை செய்த மருத்துவர்கள் அவர் ஏற்கனவே இறந்துவிட்டதாக தெரிவித்துள்ளனர். மேலும் பலத்த காயங்களுடன் இருந்த ஆதித்யாவை கோவை தனியார் மருத்துவமனைக்கு சிகிச்சைக்காக கொண்டு சென்றனர். அங்கு அளிக்கப்பட்ட சிகிச்சை பலனின்றி ஆதித்யா பரிதாபமாக உயிரிழந்தார். மேலும் இது குறித்து வழக்கு பதிவு செய்த காவல்துறையினர் விசாரணை நடத்தி வருகின்றனர்.