ஈராக்கின் குர்திஸ்தான் பிராந்தியத்தில் நடந்த பீரங்கி குண்டு தாக்குதலில் சுற்றுலா பயணிகள் 9 பேர் உயிரிழந்துள்ளனர்.
ஈராக் நாட்டில் குர்திஸ்தான் பிராந்தியத்தில் உள்ள டோஹூக் பகுதியின் சாகோ என்ற மாவட்டம் அமைந்துள்ளது. இந்த மாவட்டத்தில் ஒரு பூங்கா செயல்பட்டு கொண்டுள்ளது. இந்தப் பூங்கா மீது நேற்று முன்தினம் பீரங்கி குண்டு தாக்குதல் நடத்தப்பட்டுள்ளது. இந்த விபத்தில் அப்பாவி மக்கள் உள்பட 9 சுற்றுலாப்பயணிகளும், குழந்தைகளும் உயிரிழந்துள்ளனர். மேலும் 23 பேர் படுகாயமடைந்தனர். இந்த சம்பவம் அப்பகுதியில் பெரும் பதற்றத்தை ஏற்படுத்தியுள்ளது. இந்த தாக்குதலுக்கு துருக்கிப் படைகள் தான் காரணம் என்று உள்ளூர் அதிகாரிகள் குற்றம் சாட்டியுள்ளனர். இதனால் ஈராக், துருக்கி இடையே தூதரக ரீதியிலான மோதல் வெடித்தது. உடனடியாக துருக்கியின் அங்காரா நகரில் இருந்த தனது தூதரக அதிகாரிகளை ஈராக் திரும்பப் பெற்றுள்ளது. ஆனால் குர்திஸ்தான் போராளிகள் தான் இந்த தாக்குதலை நடத்தி இருப்பதாக துருக்கி கூறுகின்றது. இந்த தாக்குதலில் படுகாயம் அடைந்த ஹசன் தசின் அலி என்பவர் இது குறித்து கூறியதாவது, “இந்த தாக்குதல் கண்மூடித்தனமான தாக்குதாகும். எங்கள் இளைஞர்கள் பலியாகிவிட்டனர். எங்கள் குழந்தைகளும் உயிரிழந்திருக்கிறார்கள். நாங்கள் யாரிடம் செல்வது?” என வேதனையுடன் குறிப்பிட்டார். பாக்தாத்தில் உள்ள துருக்கி தூதரை நேரில் அழைத்து ஈராக் தனது கண்டனத்தை பதிவு செய்தது.
ஈராக் பிரதமர் முஸ்தபா அல் காதிமி டுவிட்டரில் வெளியிட்ட பதிவில் கூறியதாவது, “துருக்கி படைகள் ஈராக்கின் இறையாண்மையை அப்பட்டமாக மீறி விட்டன” என குறிப்பிட்டுள்ளார். இந்த சம்பவத்தை அடுத்து ஈராக்கில் உள்ள கர்பலா நகரில் துருக்கி எதிர்ப்பு போராட்டம் வெடித்தது. இந்த போராட்டத்தில் துருக்கி விசா மையம் முன்பாக அந்த நாட்டின் கொடியை போராட்டக்காரர்கள் தீயிட்டுக்கொளுத்தினார்கள். பாக்தாத், நசிரியா நகரங்களிலும் போராட்டம் நடந்ததுள்ளது. இந்த தாக்குதலுக்கு அமெரிக்கா கடும் கண்டனம் தெரிவித்துள்ளது. இது குறித்து அமெரிக்க வெளியுறவு செய்தி தொடர்பாளர் நெட் பிரைஸ் கூறியதாவது “பொதுமக்கள் கொல்லப்படுவதை ஏற்கவே முடியாது. மேலும் அனைத்து நாடுகளும் பொதுமக்களின் பாதுகாப்பு போன்ற சர்வதேச சட்டத்தின்கீழ் தங்கள் கடமைகளை மதிக்க வேண்டும்” என்று குறிப்பிட்டார். இதை போன்று இங்கிலாந்தும் கண்டனம் தெரிவித்துள்ளது. இது குறித்து இங்கிலாந்து வெளியுறவு மற்றும் காமன்வெல்த் அலுவலகம் வெளியிட்டுள்ள அறிக்கையில் கூறியதாவது, ” சாகோ பகுதியில் நடந்துள்ள தாக்குதலில் அப்பாவி மக்கள் இறந்திருப்பது மிகுந்த கவலையை அளிக்கின்றது. இதில் பாதிக்கப்பட்டவர்களுக்கு எங்களது ஆழ்ந்த அனுதாபத்தை தெரிவித்துக்கொள்கிறோம். ஈராக் அதிகாரிகளின் புலன்விசாரணையில் எங்கள் ஆதரவு உண்டு என்பதை தெரிவித்துக்கொள்கிறோம்” என கூறப்பட்டுள்ளது.