சிபிஎஸ்சி பொதுத்தேர்வில் தூத்துக்குடி மாணவி சாதனை படைத்துள்ளார்.
பத்தாம் வகுப்பு சிபிஎஸ்சி பொது தேர்வு முடிவுகள் நேற்று வெளியானது. இந்த நிலையில் இத்தேர்வில் தூத்துக்குடி மாவட்டத்தை சேர்ந்த கிங் ஆப் கிங்ஸ் பள்ளி மாணவி செல்வலட்சுமி தமிழ் பாடத்தில் நூற்றுக்கு நூறு மதிப்பெண்கள் பெற்று சாதனை படைத்துள்ளார். சாதனை படைத்த மாணவிக்கு பள்ளி முதல்வர், ஆசிரியர்கள், மாணவ- மாணவிகள் பாராட்டுகளை தெரிவித்து வாழ்த்துக்களை கூறினார்கள். இந்நிலையில் மாணவி செல்வலட்சுமி பேசியதாவது, எனது தந்தை முத்துமாரியப்பன். தாயார் ராமலட்சுமி. நான் தொடர்ந்து இப்பள்ளியிலேயே படித்து வந்த நிலையில் பள்ளி தேர்வுகளிலும் அதிக மதிப்பெண்கள் பெற்று வந்தேன்.
மற்ற பாடங்களை விட தமிழ் பாடத்தில் எப்போதும் அதிக மதிப்பெண்கள் பெற்று வந்ததை கண்ட எனது பள்ளி தாளாளர், முதல்வர், ஆசிரியர்கள் உள்ளிட்டோர் என்னை பொதுத் தேர்வில் தமிழ் பாடத்தில் அதிக மதிப்பெண்கள் பெற்று மாநில அளவில் சிறப்பிடம் பெற வேண்டும் என எனக்கு ஊக்கம் அளித்து பாடங்களை கற்பித்து வந்தனர். இதனால் நான் ஆர்வமுடன் படித்து பொது தேர்வு எழுதினேன். இந்நிலையில் 100 மதிப்பெண்கள் தமிழ் பாடத்தில் பெற்றுள்ளேன். இது எனக்கு மிகுந்த மகிழ்ச்சியை அளிக்கின்றது. எனக்கு உறுதுணையாக இருந்த பள்ளி நிர்வாகத்திற்கும் ஆசிரியர்களுக்கும் எனது நன்றியை தெரிவித்துக் கொள்வதாக கூறியுள்ளார்.