செஸ் ஒலிம்பியாட் போட்டியின் தொடக்க விழா சென்னை நேரு ஸ்டேடியத்தில் தற்போது தொடங்கியுள்ளது. 44வது செஸ் ஒலிம்பியாட் போட்டி மாமல்லபுரம், பூந்தேரி, கிழக்கு கடற்கரை சாலையில் அமைந்துள்ள போஸ்பாயிண்ட் ரிசர்ட் என்கின்ற ஐந்து நட்சத்திர தகுதி பெற்ற அரங்கில் நடைபெற்று வருகிறது. இதற்கு பிரமாண்ட ஏற்பாடுகள் செய்யப்பட்டுள்ளன. இன்று முதல் அடுத்த மாதம் 10ம் தேதி வரை இந்த போட்டிகள் நடைபெற உள்ளது.
187 நாடுகளை சேர்ந்த 2000க்கும் மேற்பட்ட வீரர்கள், வீராங்கனைகள், பயிற்சியாளர்கள் மற்றும் உதவியாளர்கள் இந்த போட்டியில் பங்கேற்றுள்ளனர். போட்டியின் தொடக்க விழா சென்னை நேரு ஸ்டேடியத்தில் நடைபெற்று வருகிறது. செஸ் ஒலிம்பிக் நிகழ்ச்சி நடைபெறும் இடத்திற்கு வேட்டி சட்டையில் வந்த பிரதமர் மோடியை முதல்வர் மு க ஸ்டாலின் வரவேற்றார். இதைத்தொடர்ந்து அவருக்கு நினைவு பரிசு வழங்கப்பட்டது. இந்நிலையில் தற்போது கமலஹாசனின் கம்பீரக் குரலில் தமிழ்நாட்டின் கலாச்சார வளர்ச்சி குறித்த நிகழ்த்துக்கலை நடைபெற்று வருகின்றது. 1200 ஆண்டுகளுக்கு முன்பு மயிலாடும்பாறையில் தமிழர் கலை, கலாச்சாரம் செலுத்தி இருந்ததற்கான சான்று குறித்து நிகழ்ச்சி நடைபெற்று வருகின்றது.