ராஜஸ்தான் மற்றும் குஜராத் ஆகிய மாநிலங்களில் மர்மநோய் தாக்கி கால்நடைகள் கொத்துக் கொத்தாக மடிந்துவருகிறது. இந்த இரு மாநிலங்களில் 3 ஆயிரத்துக்கு அதிகமான கால்நடைகளும், பஞ்சாப்பில் 400க்கு மேற்பட்ட கால்நடைகளும் உயிரிழந்துள்ளது. இது அந்த மாநிலங்கள் மத்தியில் பெரும் அதிர்ச்சியை ஏற்படுத்தி இருக்கிறது. இந்நோயை கட்டுப்படுத்துவதற்கு மத்திய-மாநில அரசுகள் தீவிர நடவடிக்கை மேற்கொண்டு வருகின்றன.
இந்நிலையில் மர்மநோயை கட்டுப்படுத்த மிகப் பெரிய அளவிலான தடுப்பூசி பணிகள் தேவை என்றும் கால்நடைகளை மாநிலங்களுக்கு இடையில் கொண்டு செல்வதை தடுக்க வேண்டும் எனவும் இந்திய வம்சாவளியைச் சேர்ந்த கால்நடை மருத்துவர்களின் அமெரிக்க சங்கத்தின் தலைவர் ரவி முரார்கா தெரிவித்துள்ளார். வடஅமெரிக்காவின் ராஜஸ்தான் சங்கத்தின் கால்நடை பராமரிப்புத் துறை தலைவராகவும் இயங்கி வரும் இவர், ராஜஸ்தானில் நிலைமை மோசமாக உள்ளதாக தெரிவித்துள்ளார். இந்நோயை சமாளிப்பது மற்றும் அதற்கான தடுப்பூசிகளை இந்தியாவுக்கு விரைவாக அனுப்புவது பற்றி நிபுணர்களுடன் பேச்சுவார்த்தைகள் தொடங்கப்பட்டுள்ளதாகவும் முரார்கா தெரிவித்துள்ளார்.