மரத்தின் மீது ஸ்கூட்டர் மோதி விபத்தில் பள்ளி மாணவி உயிரிழந்த சம்பவம் சோகத்தை ஏற்படுத்தியுள்ளது.
புதுக்கோட்டை மாவட்டத்தில் உள்ள அன்னவாசல் மேட்டு தெருவில் பன்னீர் என்பவர் வசித்து வருகிறார். இவருக்கு லாவண்யா(17) என்ற மகள் இருந்துள்ளார். அதே பகுதியில் மணி மகள் கோபிகா(17) என்பவரும் வசித்து வருகிறார். இருவரும் அன்னவாசல் அரசு மேல்நிலைப் பள்ளியில் 12-ஆம் வகுப்பு படித்து வந்துள்ளனர். கடந்த 15-ஆம் தேதி பள்ளியில் நடைபெற்ற சுதந்திர தின விழாவில் லாவண்யாவும், கோபிகாவும் கலந்து கொண்டனர். இதனை அடுத்து இருவரும் ஸ்கூட்டரில் புதுக்கோட்டை சாலையில் சென்று கொண்டிருந்தனர். அந்த ஸ்கூட்டரை கோபிகா ஒட்டி சென்றுள்ளார்.
இந்நிலையில் சித்தன்னவாசல் அருகே சென்று கொண்டிருந்த போது எதிர்பாராதவிதமாக கட்டுப்பாட்டை இழந்த ஸ்கூட்டர் சாலையோர புளிய மரத்தில் மோதியது. இந்த விபத்தில் படுகாயமடைந்த மாணவிகளை அக்கம் பக்கத்தினர் மீட்டு புதுக்கோட்டை அரசு மருத்துவமனையில் சிகிச்சைக்காக அனுமதித்தனர். அங்கு சிகிச்சை பலனின்றி நேற்று முன்தினம் லாவண்யா பரிதாபமாக உயிரிழந்தார். இதுகுறித்து வழக்கு பதிந்த போலீசார் விசாரணை மேற்கொண்டு வருகின்றனர். இந்த சம்பவம் அப்பகுதியில் பெரும் சோகத்தை ஏற்படுத்தியுள்ளது.