பள்ளி மற்றும் கல்லூரிகளில் மாணவ-மாணவிகளுக்கு கல்வி கற்றுக்கொடுப்பது மட்டுமின்றி அவர்களின் திறமையை வெளிப்படுத்த அவ்வப்போது விளையாட்டுப் போட்டிகளும் நடத்தப்பட்டு வருகிறது. இதனால் மாணவ-மாணவிகள் விளையாட்டு போட்டிகளில் பங்கேற்று தங்களுக்குள் இருக்கும் திறமையை வெளிப்படுத்தி பாராட்டுகளை பெற்று வருகின்றனர்.
அதன்படி கோவை மாவட்டத்திலுள்ள வால்பாறை பகுதியில் இருக்கும் அரசு பள்ளி மற்றும் தனியார் பள்ளிகளுக்கு இடையில் மண்டல அளவிலான பல போட்டிகள் கோட்டூரில் நடந்தது. இவற்றில் வால்பாறை பகுதியிலுள்ள அரசு பள்ளி மாணவர்கள் பங்கேற்று தங்களது திறமைகளை வெளிப்படுத்தினர்.
இந்த போட்டியில் எம்.ஜி.ஆர். நகரிலுள்ள மலைவாழ் கிராமமக்களின் குழந்தைகள் தங்கி படிக்கும் உண்டு உறைவிட பள்ளி மாணவி கவிசிரி கலந்துகொண்ட கால்பந்து அணி முதலிடம் பெற்றது. இதேபோன்று கைப்பந்து போட்டியிலும் உண்டு உறைவிட பள்ளியின் மாணவிகள் வெற்றி பெற்றனர். இதனால் அவர்களை ஆசிரியர்கள் மற்றும் சக மாணவ, மாணவிகள் பாராட்டினர்.