இந்திய ரயில்வே உலகின் 4வது பெரிய ரயில் அமைப்பு என்பது நாம் அனைவரும் அறிந்த ஒன்று. ரயிலில் பயணம் செய்யாதவர்களை பார்ப்பது மிகவும் அரிதாகும். இப்போது ரயில்களில் பல்வேறு வசதிகள் வரத்துவங்கியுள்ளது. இந்திய ரயில்களில் பல்வேறு வகையான ரயில் பெட்டிகள் இருக்கிறது. பொதுவகுப்பு, ஸ்லீப்பர், 3ம் வகுப்பு, 2ஆம் வகுப்பு மற்றும் முதல் வகுப்பு. இது தவிர்த்து காலப் போக்கில் இந்திய ரயில்வேயில் பல்வேறு வகையான ரயில் பெட்டிகள் இணைக்கப்பட்டது. அதாவது, நாட்டின் முதல் ஏசி ரயிலின் பெயர் பிரான்டியர் மெயில் ரயில் ஆகும். இந்த ரயில் 94 வருடங்களுக்கு முன் 1928ம் வருடம் செப்டம்பர் 1ம் தேதி தன் பயணத்தைத் துவங்கியது. முன்பாக இந்த ரயில் பஞ்சாப் எக்ஸ்பிரஸ் என அழைக்கப்பட்டது. ஆனால் 1934ஆம் வருடத்தில், அதில் AC கோச் சேர்க்கப்பட்டதும் அதன் பெயர் ஃபிரான்டியர் மெயில் என மாற்றப்பட்டது.
இது மிகவும் சிறப்புமிக்க ரயில் ஆகும். அந்த சமயத்தில் ராஜதானி போன்ற ரயில்களைப் போன்றே இதுவும் முக்கியமானது. இதனிடையில் பிரான்டியர் மெயிலின் ஏசி ரயிலை குளிர்ச்சியாக வைத்திருக்க, இன்றுபோல நவீன உபகரணங்கள் பயன்படுத்தப்படவில்லை. எனினும் ஒரு சிறப்பு தொழில்நுட்பம் பயன்படுத்தப்பட்டது. அதாவது ரயிலை குளிர்ச்சியாக வைத்திருக்க ஐஸ்கட்டிகள் பயன்படுத்தப்பட்டன. ஏசி போகியை குளிர்விக்க, போகியின் அடியில் ஒருபெட்டி வைக்கப்பட்டிருந்தது. அப்பெட்டியில் ஐஸ் வைத்து மின் விசிறி நிறுவப்பட்டது. இந்த மின் விசிறியின் உதவியுடன் பெட்டிகள் குளிர்விக்கப்பட்டது. இந்த ரயிலானது மும்பையிலிருந்து ஆப்கானிஸ்தான் எல்லை, பெஷாவர் வரை இயக்கப்பட்டது.
இந்நிலையில் பிரிட்டிஷ் அதிகாரிகளைத் தவிர்த்து, சுதந்திரப் போராட்ட வீரர்களும் இந்த ரயிலில் பயணம் மேற்கொண்டனர். இந்த ரயில் டெல்லி, பஞ்சாப் மற்றும் லாகூர் வழியே பெஷாவர் சென்றடையும். பிரான்டியர் மெயில் இப்பயணத்தை 72 மணிநேரத்தில் நிறைவடையும். பயணத்தின் பல நிலையங்களில் உருகிய பனி அகற்றப்பட்டு, அவற்றில் பனிக்கட்டிகள் நிரப்பப்பட்டது. இந்த ரயிலில் நேதாஜி சுபாஷ் சந்திர போஸ் மற்றும் மகாத்மா காந்தி போன்றோர் அமர்ந்து பயணித்தது மிகவும் சிறப்பு வாய்ந்தது. மேலும் இந்த ரயிலின் மற்றொரு சிறப்பு என்னவெனில், அது ஒரு போதும் தாமதம் அடையாமல் பயணிக்கிறது.
கடந்த 1934ம் வருடம் ரயில் புறப்பட்டு 11 மாதங்கள் கழித்து ஒருமுறை தாமதமானபோது, அரசாங்கம் நடவடிக்கை மேற்கொண்டு டிரைவருக்கு நோட்டீஸ் அனுப்பி பதில்கோரியது. 1930-40 வரை இந்த ரயிலில் 6 பெட்டிகள் இருந்தபோது, 450 பேர் அதில் பயணம் மேற்கொண்டனர். பயணத்தின்போது முதல் மற்றும் 2ஆம் வகுப்பு பயணிகளுக்கு உணவும் வழங்கப்பட்டது. அத்துடன் பயணிகளுக்கு பொழுதுபோக்கிற்காக செய்தித்தாள்கள், புத்தகங்கள், வழங்கப்பட்டது. சுதந்திரத்திற்குப்பின் இந்த ரயில் மும்பையில் இருந்து அமிர்தசரஸ் வரை இயக்கத் துவங்கியது. 1996-ல் அதன் பெயர் “கோல்டன் டெம்பிள் மெயில்” என மாற்றப்பட்டது.