பொன்னியின் செல்வன் திரைப்படத்தின் முதல் நாள் வசூல் குறித்த தகவல் வெளியாகியுள்ளது.
மணிரத்தினம் இயக்கத்தில் இரண்டு பாகங்களாக உருவாகி நேற்று பொன்னியின் செல்வன் திரைப்படத்தின் முதல் பாகம் வெளியாகியுள்ளது. இப்படத்தில் கார்த்தி, விக்ரம், ஜெயம் ரவி, ஐஸ்வர்யா ராய், த்ரிஷா என மிகப் பெரிய நட்சத்திர பட்டாளமே நடித்துள்ளது. மேலும் இத்திரைப்படத்தை மெட்ராஸ் டாக்கீஸ் நிறுவனமும் லைகா நிறுவனமும் இணைந்து தயாரிக்க படத்திற்கு இசை புயல் ஏ.ஆர்.ரகுமான் இசையமைத்துள்ளார்.
இத்திரைப்படமானது தமிழ், தெலுங்கு, ஹிந்தி, கன்னடம், மலையாளம் உள்ளிட்ட ஐந்து மொழிகளில் பிரம்மாண்டமாக வெளியாகி ரசிகர்கள் மத்தியில் நல்ல வரவேற்பை பெற்று வருகின்றது. டிக்கெட் முன்பதிவு ஆரம்பமான சில மணி நேரத்தில் இரண்டு வாரங்களுக்கான டிக்கெட்டுகள் விற்பனையாகி சாதனை படைத்தது. மேலும் இத்திரைப்படம் ஐயாயிரத்திற்கும் மேற்பட்ட திரையரங்கில் வெளியாகியுள்ளது.
இந்நிலையில் இத்திரைப்படத்தின் முதல் நாள் வசூல் குறித்த தகவல் வெளியாகியுள்ளது. அதன்படி முதல் நாளில் 25 கோடிக்கு மேல் வசூலித்திருப்பதாக சொல்லப்படுகின்றது. தமிழகத்தில் 25 கோடிக்கு மேலும் இந்தி பதிப்பில் 15 கோடிக்கு மேலும் இந்திய அளவில் 42 கோடிக்கு மேல் வசூல் செய்திருப்பதாக செய்தி வெளியாகி இருக்கின்றது. முதல் நாளில் அதிக வசூலை பெற்று பொன்னியின் செல்வன் திரைப்படம் சாதனை படைத்திருக்கின்றது.