தமிழகத்தில் திமுக ஆட்சியில் மு.க.ஸ்டாலின் முதலமைச்சராக பதவி வகித்து வருகிறார். ஸ்டாலின் முதலமைச்சராக பதவியேற்று ஒன்றரை ஆண்டுகள் முடிந்து விட்டது. திமுக ஆட்சி பொறுப்புக்கு வந்த பிறகு பல்வேறு நலத்திட்டங்களை அறிவித்து, அதனை செயல்படுத்தி வருகிறது. அதிலும் நகரப் பேருந்துகளில் மகளிர், மாற்றுத்திறனாளி, திருநங்கைகள் ஆகியோருக்கு இலவச பயணம், 7.5% இட ஒதுக்கீட்டின் கீழ் அரசு பள்ளி மாணவர்களுக்கு இட ஒதுக்கீடு, முதலமைச்சரின் காலை உணவு திட்டம், உயர்கல்வி பயிலும் மாணவிகளுக்கு ரூ.1000 மாதம் தோறும் ஊக்கத்தொகை உள்ளிட்ட பல்வேறு நலத்திட்டங்களை தொடர்ந்து அறிவிக்கப்பட்டு வருகின்றனர்.
இந்நிலையில் தமிழக அரசு சிறப்புத் திட்டங்கள் முறையாக செயல்படுகிறதா என்பதை கண்காணிப்பதற்காக மாநிலம் முழுவதும் 30 சிறப்பு அதிகாரிகள் நியமனம் செய்து அரசு உத்தரவு பிறப்பித்துள்ளது. அதனைத் தொடர்ந்து சிறப்பு திட்ட செயலாக்க துறையின் திட்டங்களின் செயல்பாடுகள், தரவுகள் குறித்து ஆராய மாவட்ட வாரியாக அதிகாரிகள் மாதத்தில் 4 நாட்கள் ஒதுக்கப்பட்ட மாவட்டங்களில் அதிகாரிகள் ஆய்வு செய்து, அது குறித்து அறிக்கையை அரசிடம் ஒப்படைக்க வேண்டும் என்று உத்தரவிட்டுள்ளார்.