பாகிஸ்தானின் டாப் ஆர்டர் பேட்டர் ஷான் மசூத்துக்கு தலையில் அடிபட்ட நிலையில் முகமது நவாஸ் சோகமாக காணப்பட்ட வீடியோ வைரலாகி வருகிறது.
ஆஸ்திரேலியாவில் ஐசிசி டி20 உலகக் கோப்பை கிரிக்கெட் தொடர் தகுதிச்சுற்று போட்டிகள் கடந்த 16ஆம் தேதி முதல் தொடங்கி நடைபெற்று வருகிறது. இன்றுடன் அனைத்து தகுதி சுற்று ஆட்டங்கள் முடிவடையும் நிலையில், ஏற்கனவே குரூப் ஏ பிரிவில் நடைபெற்ற தகுதி சுற்று ஆட்டத்தில் வெற்றிபெற்று இலங்கை மற்றும் நெதர்லாந்து அணிகள் 4 புள்ளிகளுடன் சூப்பர் 12 சுற்றுக்கு தகுதி பெற்றது. அதேபோல குரூப் பி பிரிவில் அயர்லாந்து மற்றும் ஜிம்பாப்வே அணி சூப்பர் 12 சுற்றுக்கு தகுதி பெற்றுள்ளது.
இதையடுத்து நாளை முதல் பிரதான சூப்பர் 12 சுற்று தொடங்கும் நிலையில், அடுத்த நாள் ஞாயிற்றுக்கிழமை 23ஆம் தேதி இந்தியா- பாகிஸ்தான் போட்டி நடைபெற உள்ளது. இந்த போட்டியை உலக கிரிக்கெட் ரசிகர்கள் எதிர்பார்த்து காத்துக் கொண்டுள்ளனர். இதற்கிடையே அனைத்து அணி வீரர்களும் தீவிர வலைப்பயிற்சியில் ஈடுபட்டு வருகின்றனர். அதன்படி பாகிஸ்தான் அணியினரும் தீவிர பயிற்சி மேற்கண்ட போது ஒரு அசம்பாவித சம்பவம் நடந்துள்ளது.
ஒரு துரதிர்ஷ்டவசமான சம்பவத்தில், பாகிஸ்தானின் டாப் ஆர்டர் பேட்டர் ஷான் மசூத், சக வீரரின் ஷாட் மூலம் தலையில் அடிபட்டார். 3-வது இடத்தில் விளையாடும் இடது கை பேட்டர், தலையில் அடிபட்ட பிறகு 5-7 நிமிடங்கள் தரையில் கிடந்ததாக கூறப்படுகிறது. மெல்போர்ன் கிரிக்கெட் மைதானத்தில் (எம்சிஜி) பாகிஸ்தானின் பயிற்சியின் போது இந்த சம்பவம் நடந்தது.
ஆம், இன்று அருகருகே பயிற்சி செய்தபோது போது, முகமது நவாஸ் அடித்த ஒரு ஷாட் தெரியாமல் மசூத்தின் தலையின் வலது பக்கத்தில் பலமாக தாக்கியது. இதில் அவர் சுருண்டு விழுந்ததும் அணியின் மருத்துவரும், பிசியோவும் விரைந்து வந்து அவரை உன்னிப்பாகப் பார்த்து முதலுதவி சிகிச்சை அளித்தனர்.. பின்னர் ஸ்கேன் பரிசோதனைக்காக மருத்துவமனைக்கு அழைத்துச் சென்றனர். மருத்துவமனைக்கு செல்லப்படுவதற்கு முன்பு மசூத் மைதானத்தில் சிகிச்சை பெறும் வீடியோ ட்விட்டரில் வெளியாகியுள்ளது.
அதே சமயம் ஷான் மசூத் களத்தில் படுத்து கிடக்க அணி மருத்துவர்கள் வந்து அவருக்கு முதலுதவி சிகிச்சை அளித்தபோது சுற்றி சக வீரர்கள் நின்று கொண்டிருக்க, பந்தை அடித்த நவாஸ் தனியாக அமர்ந்திருக்கிறார். அவர் மிகவும் சோகத்துடன் காணப்படுகிறார். இந்த வீடியோ சமூக வலைதளங்களில் வைரலாகி வருகிறது..
பாகிஸ்தானின் மூன்றாவது பேட்ஸ்மேனாக ஃபக்கர் ஜமானுக்குப் பதிலாக மசூத் இடம்பிடித்திருந்தார். இதனிடையே மசூத் காயம் பெரிதாக இருக்கக்கூடாது என பாக்.,ரசிகர்கள் சமூக வலைதளங்களில் பிரார்த்தனை செய்து வருகின்றனர்.
https://twitter.com/damnharris/status/1583327580916428801
https://twitter.com/asfeworld_tv/status/1583344842859769856