சென்னையில் சாலையோர மக்களுக்கு தங்குமிடம், உணவு வசதி ஏற்படுத்தி தர கோரி நீதிமன்றம் உத்தரவிட்டுள்ளது.
கொரோனோ அச்சுறுத்தல் காரணமாக நாளை ஒருநாள் சுய ஊரடங்கு கடைபிடிக்குமாறு பாரதப் பிரதமர் நரேந்திர மோடி அறிவுறுத்தினார். அதன்படி பேருந்துகள்,மெட்ரோ,ரயில் உள்ளிட்ட எந்த போக்குவரத்து சேவையும் தமிழகத்தில் நாளை இயங்காது பொதுமக்கள் வீட்டை விட்டு வெளியே வரவேண்டாம் என தொடர்ந்து அறிவுறுத்தப்பட்டு வருகிறது.
இந்நிலையில் சாலையோரங்களில் வசிக்கும் மக்களையும் பாதுகாப்பான இடத்தில் வைக்குமாறு பொதுநல வழக்கு தொடரப்பட்டது. அதை விசாரித்த சென்னை உயர்நீதிமன்றம், சாலையோரத்தில் இருக்கும் மக்களை சமூக நலக் கூடத்தில் தங்க வைத்து உணவளிக்க வேண்டும் என்று உத்தரவிட்டு உள்ளது. மேலும் சென்னையில் சுமார் 9000க்கும் அதிகமானோர் சாலையோரங்களில் வசித்து வருவதாக புள்ளி விவரங்கள் தெரிவிக்கின்றன அவர்களை சமூகநலக் கூடங்கள் மட்டுமல்லாமல் தனியார் திருமண மண்டபங்களில் தங்க வைத்து உணவு அளிக்கலாம் என்று தமிழக அரசுக்கும் சென்னை மாநகராட்சிக்கு நீதிமன்றம் அறிவுறுத்தியுள்ளது.