பெண் தீக்குளித்து தற்கொலை செய்து கொண்ட வழக்கில் விவசாயி ஒருவர் காவல்துறையினரால் கைது செய்யப்பட்டுள்ளார்.
மயிலாடுதுறை மாவட்டத்தில் உள்ள பழையபாளையம் கிராமத்தில் மாலா என்பவர் வசித்து வந்தார். இவருக்கு திருமணம் ஆகாததால் தனது தாய் தந்தையருடன் வசித்து வந்தார். இதே பகுதியில் விவசாயி பவுன்ராஜ் என்பவர் தனது குடும்பத்துடன் வசித்து வருகிறார். இவர் மாலாவுக்கு சொந்தமான ஒரு ஏக்கர் நிலத்தை ஆக்கிரமித்து கடந்த மூன்று ஆண்டுகளாக பயன்படுத்தி வந்துள்ளார். இதனை மாலா பலமுறை கேட்டும் அவர் கொடுக்காமல் இருந்துள்ளார். மேலும் பவுன்ராஜ் அந்த நிலத்திற்கு மாலாவை செல்ல விடாமல் தடுத்து நிறுத்தியுள்ளார்.
இதனால் மனமுடைந்த மாலா நேற்று முன்தினம் பவுன்ராஜ் வீட்டின் முன்பு நின்று தன் உடலின் மீது மண்ணெண்ணெய் ஊற்றி தீ வைத்துக் கொண்டார். இதில் படுகாயமடைந்த அவரை 108 ஆம்புலன்ஸ் மூலம் சிகிச்சைக்காக மருத்துவமனையில் அனுமதித்தனர். அங்கு அவருக்கு தீவிர சிகிச்சை அளிக்கப்பட்டும் பலன் அளிக்காத காரணத்தினால் அவர் பரிதாபமாக உயிரிழந்துள்ளார். இதுகுறித்து தகவலறிந்த புதுப்பட்டினம் காவல்துறையினர் சம்பவ இடத்திற்கு விரைந்து சென்று பவுன்ராஜை கைது செய்து விசாரணை நடத்தி வருகின்றனர்.