இருசக்கர வாகனம் நிலைதடுமாறிய விபத்தில் ஒருவர் உயிரிழந்த சம்பவம் சோகத்தை ஏற்படுத்தியுள்ளது.
மதுரை மாவட்டத்திலுள்ள பழையூர் கிராமத்தில் பிச்சைமணி என்பவர் வசித்து வந்தார். இவர் சம்பவம் நடந்த அன்று பெயிண்ட் பண்ணுவதற்கு தேவையான பொருட்களை வாங்குவதற்காக வடகரைபட்டிக்கு தனது இருசக்கர வாகனத்தில் சென்றுள்ளார். அவர் சாப்டூர் பகுதியில் உள்ள பாலத்தில் சென்று கொண்டிருக்கும்போது திடீரென இருசக்கர வாகனம் நிலைதடுமாறியதில் பிச்சைமணி கீழே விழுந்து பலத்த காயம் அடைந்துள்ளார்.
பின்னர் உடனடியாக அருகில் இருந்தவர்கள் அவரை மீட்டு சிகிச்சைக்காக பேரையூர் அரசு மருத்துவமனையில் அனுமதித்துள்ளனர். அங்கு அவருக்கு முதலுதவி அளிக்கப்பட்டு பின்னர் மேல் சிகிச்சைக்காக மதுரை அரசு மருத்துவமனைக்கு அனுப்பி வைக்கப்பட்டுள்ளார். அங்கு டாக்டர்கள் சிகிச்சை அளித்தும் பலன் அளிக்காத காரணத்தினால் அவர் பரிதாபமாக உயிரிழந்துள்ளார். இந்த விபத்து குறித்து வழக்குப்பதிவு செய்த காவல்துறையினர் தீவிர விசாரணை நடத்தி வருகின்றனர்.