திருநெல்வேலி மாவட்டத்தில் 16 வயது சிறுமியை திருமணம் செய்த இளைஞன் உட்பட 5 பேர் மீது போக்சோ சட்டத்தில் வழக்கு பதிவு செய்து கைது செய்துள்ளனர்.
திருநெல்வேலி மாவட்டம் திசையன்விளை பகுதியில் உள்ள இடையன்குடியில் ராஜேஷ்(22) என்ற இளைஞர் வசித்து வருகிறார். இவருக்கும் அதே பகுதியை சேர்ந்த 16 வயது சிறுமிக்கும் கடந்த ஆண்டு ஜூன் மாதம் குடும்பத்தினரின் சம்மதத்துடன் திருமணம் நடைபெற்றுள்ளது. இதனையடுத்து சிறுமி தற்போது கர்ப்பம் அடைந்துள்ளதால் திசையன்விளை அரசு மருத்துவமனைக்கு பரிசோதனைக்காக அழைத்து சென்றுள்ளனர். அப்போது மருத்துவர் சிறுமியின் வயதில் சந்தேகமடைந்து ராதாபுரம் சமூக நல விரிவாக்க அலுவலர் சுசிலாவிடம் தகவல் தெரிவித்துள்ளார்.
இதனை தொடர்ந்து சமூக நல விரிவாக்க அலுவலர் உடனடியாக வள்ளியூர் அனைத்து மகளிர் காவல் நிலையத்தில் புகார் அளித்துள்ளார். இந்த புகாரின் அடிப்படையில் இன்ஸ்பெக்டர் பாரதி பிரியா நடத்திய விசாரணையில் சிறுமியின் வயதை மறைத்து திருமணம் செய்தது உறுதியாகியுள்ளது. மேலும் சிறுமியை திருமணம் செய்த ராஜேஷையும், அவருடைய பெற்றோர் மற்றும் சிறுமியின் பெற்றோரையும் போலீசார் கைது செய்துள்ளனர். இந்த 5 பேர் மீதும் குழந்தை திருமண தடுப்பு பிரிவு சட்டத்திலும், போக்சோ சட்டத்திலும் வழக்கு பதிவு செய்து விசாரணை மேற்கொண்டு வருகின்றனர்.