டிப்பர் லாரி மோதிய விபத்தில் வாலிபர் உயிரிழந்த சம்பவம் சோகத்தை ஏற்படுத்தியுள்ளது.
பெரம்பலூர் மாவட்டத்தில் உள்ள நொச்சிகுளத்தைச் சார்ந்தவர் ராஜேந்திரன். இவர் தனது உறவினரான தேவேந்திரன் என்பவருடன் மருதையான் கோவிலில் நடைபெற்ற திருமணத்திற்காக இருசக்கர வாகனத்தில் சென்றுள்ளனர். கோவில்பாளையம் அருகே சென்று கொண்டிருக்கும்போது எம் சாண்ட் ஏற்றிக்கொண்டு வந்த டிப்பர் லாரி எதிர்பாராதவிதமாக இருசக்கர வாகனத்தின் மீது மோதியது. இந்த விபத்தில் ராஜேந்திரன் சம்பவ இடத்திலேயே உயிரிழந்தார். மேலும் தேவேந்திரன் படுகாயமடைந்தார்.
இச்சம்பவம் குறித்து தகவல் அறிந்த போலீசார் சம்பவ இடத்திற்கு விரைந்து வந்து ராஜேந்திரனின் உடலை மீட்டு பிரேத பரிசோதனைக்காக பெரம்பலூர் அரசு மருத்துவமனைக்கு அனுப்பி வைத்தனர். தேவேந்திரனை அதே மருத்துவமனையில் சிகிச்சைக்காக அனுமதித்தனர். இது குறித்து போலீசார் வழக்கு பதிவு செய்து தீவிர விசாரணை மேற்கொண்டு வருகின்றனர்.