கொரோனாவால் பாதிக்கப்பட்ட நபருக்கு நடிகர் சோனு சூட் தனது சொந்த செலவில் உதவி செய்துள்ளார்.
உத்திரபிரதேச மாநிலத்திலுள்ள ஜான்சியை சேர்ந்தவர் கைலாஷ் அகர்வால் என்பவர். கொரோனா தொற்றால் பாதிக்கப்பட்ட இவர் ஜான்சியில் உள்ள மருத்துவமனையில் அனுமதிக்கப்பட்டு சிகிச்சை பெற்று வந்தார். அந்த மருத்துவமனையில் இவரது உடல்நிலை மிகவும் மோசமானதால் மேல்சிகிச்சைக்காக வேறு மருத்துவமனைக்கு அழைத்து செல்லுமாறு அறிவுறுத்தி உள்ளனர்.
இதைத் தொடர்ந்து அவரது குடும்பத்தினர் வேறு மருத்துவமனைக்கு அழைத்துச் செல்ல முயன்றுள்ளனர். ஆனால் அவர்களுக்கு எங்கும் இடம் கிடைக்கவில்லை. ஆகையால் கைலாஷ் அகர்வாலின் குடும்பத்தார் தங்களது நிலைமை குறித்து நடிகர் சோனு சூட்டுக்கு டுவிட்டர் வாயிலாக தெரிவித்தனர்.
இதனை அறிந்த சோனு சூட் ஹைதராபாத்தில் உள்ள ஒரு தனியார் மருத்துவமனையில் இடம் இருப்பதை அறிந்து கொண்டு கைலாஷ் அகர்வாலை தனது சொந்த செலவில் ஆம்புலன்ஸ் விமானத்தின் மூலம் குறிப்பிட்ட மருத்துவமனைக்கு அனுப்பி வைத்துள்ளார். இதைத் தொடர்ந்து ஹைதராபாத்தில் சிகிச்சை பெற்று வரும் கைலாஷ் தற்போது நலமுடன் உள்ளார். சோனு சூட்டின் இந்த நற்செயலுக்கு சமூக வலைத்தள பக்கத்தில் பாராட்டுக்கள் குவிந்து வருகிறது.