கொரோனா வைரஸ் தொற்றால் வேலையிழந்துள்ள ஃபெப்சி தொழிலாளர்களுக்கு நடிகரும் தயாரிப்பாளருமான உதயநிதி ஸ்டாலின் ரூ 10 லட்சம் நிதியுதவி வழங்கியுள்ளார்.
உலகம் முழுவதும் அச்சுறுத்தலை ஏற்படுத்தி வருகிறது கொரோனா வைரஸ். இந்த வைரஸ் தொற்றால் பல்வேறு துறைகள் முடங்கி கிடப்பதால் பெரிதும் நஷ்டமடைந்துள்ளன. அதிலும், குறிப்பாக அனைத்து படப்பிடிப்பும் நிறுத்தப்பட்டுள்ளதால் திரைப்பட தொழிலாளர்கள் மிகவும் பாதிக்கப்பட்டுள்ளனர்.
இந்நிலையில் தொழிலாளர்கள் மற்றும் அவர்களது குடும்பங்களுக்கு நடிகர்கள் மற்றும் நடிகர்கள் உதவ முன்வர வேண்டும் என்று, ஃபெப்சி சம்மேளனத்தின் தலைவர் ஆர்.கே. செல்வமணி வேண்டு கோள் விடுத்திருந்தார். அந்தக் கோரிக்கையை ஏற்று நடிகரும் தயாரிப்பாளருமான உதயநிதி ஸ்டாலின் ரூ. 10 லட்சத்தை நிதியுதவியாக வழங்கியுள்ளார்.
ஏற்கனவே ரஜினி, விஜய் சேதுபதி, சூர்யா, கார்த்தி, சிவகார்த்திகேயன் உள்ளிட்ட நடிகர்கள் பலரும், ஃபெப்சி தொழிலாளர்களுக்கு நிதியுதவி வழங்கியுள்ளனர் என்பது குறிப்பிடத்தக்கது.