தமிழ் சினிமாவில் பிரபல முன்னணி நட்சத்திரங்களில் ஒருவராக வலம் வருபவர் நடிகர் விஜய். இவரின் நடிப்பில் உருவாகும் படங்கள் அனைத்தும் ரசிகர்கள் மத்தியில் நல்ல வரவேற்பு பெற்று வருகிறது. தற்போது இவர் இயக்குனர் வம்சி இயக்கத்தில் வாரிசு படத்தில் நடித்துள்ளார். பொங்கலுக்கு ரிலீசாகும் இந்த திரைப்படத்தை ரசிகர்கள் எதிர்பார்த்து காத்துக் கொண்டிருக்கின்றனர்.
இதனையடுத்து சமீபத்தில் இவர் தனது ரசிகர்களை பனையூரில் உள்ள அலுவலகத்தில் சந்தித்தார். கருப்பு நிற பேண்ட் சட்டையில் ஸ்டைலாக வந்திருந்தார். விஜய் மக்கள் இயக்கத்தின் செயல்பாடுகள் குறித்து அவர் நிர்வாகிகளிடம் ஆலோசித்தார். மேலும் அவர்களுடன் புகைப்படங்களும் எடுத்துக் கொண்டார்.
கடந்த முறை இவர் பனையூர் அலுவலகத்திற்கு வந்தபோது இவரின் கார் கண்ணாடியில் தடை செய்யப்பட்ட கருப்பு நிற ஸ்டிக்கர் இருந்ததாக இவருக்கு 500 ரூபாய் அபராதம் விதிக்கப்பட்டது என்பது குறிப்பிடத்தக்கது. இந்நிலையில், தற்போது இவர் வந்த போது இவரின் காரில் ஒட்டப்பட்டு இருந்த ஸ்டிக்கர் மாற்றப்பட்டிருந்தது. இதனை இவரின் ரசிகர்கள் சமூக வலைதளபக்கத்தில் புகைப்படங்களை வெளியிட்டு தெரிவித்து வருகின்றனர்.