தமிழகத்தில் கடந்த மே 10ஆம் தேதி முதல் ஊரடங்கு அமல்படுத்தப்பட்டதன் பலனாக கொரோனா பாதிப்பு கணிசமாக குறைந்து கொண்டே வந்தது. அதனால் படிப்படியாக ஊரடங்கு தளர்வுகள் அறிவிக்கப்பட்டு வந்தன. ஆனால் தமிழகத்தில் கடந்த ஒரு சில நாட்களாக கொரோனா பாதிப்பு மீண்டும் அதிகரிக்க தொடங்கியுள்ளது. அதனால் புதிய தளர்வுகள் எதுவும் இல்லாமல் கட்டுப் பாடுகளுடன் கூடிய ஊரடங்கு மேலும் இரண்டு வாரம் நீட்டிக்கப்பட்டுள்ளது. வார இறுதியில் மூன்று நாட்கள் வழிபாட்டு தலங்களுக்கு செல்ல தடை விதிக்கப்பட்டுள்ளது.
இந்நிலையில் கொரோணா பரவலை கட்டுப்படுத்த பொதுமக்கள் அவசியமின்றி வீட்டிலிருந்து வெளியே வருவதையும், கூட்டம் கூடுவதையும் தவிர்க்க வேண்டுமென முதல்வர் ஸ்டாலின் தெரிவித்துள்ளார். மக்கள் அனைவரும் அரசின் முயற்சிகளுக்கு முழு ஒத்துழைப்பு அளித்து கொரோனா தொற்றை முற்றிலும் அகற்ற உதவிட வேண்டும். விழிப்புணர்வு நடவடிக்கைகளில் உள்ளாட்சிகள் ஈடுபட வேண்டும். நோய் பரவலை தடுக்க முன்மாதிரி நடவடிக்கைகள் எடுக்க வேண்டும் என்று அவர் கூறியுள்ளார்.