ஆப்கான் பிரதிநிதிகள் உடனான பேச்சுவார்த்தையில் செயல்பாடுகள் மூலமே தலீபான்கள் மதிப்பிடப்படுவார்கள் என அமெரிக்கா திட்டவட்டமாக கூறியுள்ளது.
ஆப்கானில் ஆட்சி மாற்றத்திற்கு பின் முதல் முறையாக கடந்த 9 ஆம் தேதி கத்தார் தலைநகர் தோகாவில் தலீபான் பயங்கரவாத அமைப்பின் பிரதிநிதிகள் மற்றும் அமெரிக்க அரசின் மூத்த அதிகாரிகள் சந்தித்து பேசினர். இதனை தொடர்ந்து நேற்று முன்தினமும் இருதரப்புக்கும் இடையே பேச்சுவார்த்தை நடந்தது. இந்த பேச்சுவார்த்தையில் தலீபான்கள் உடனான பேச்சுவார்த்தை நேர்மறையாக அமைந்தது. இருப்பினும் தலீபான்களின் செயல்பாடுகள் மூலமே அவர்கள் மதிப்பிடப்படுவார்கள் என்றும் அமெரிக்க அரசு தெரிவித்துள்ளது.
மேலும் இது குறித்து அமெரிக்க வெளியுறவு அமைச்சகத்தின் செய்தி தொடர்பாளர் நெட் பிரைஸ் கூறுயதாவது, “தலீபான் பிரதிநிதிகள் மற்றும் அமெரிக்க அதிகாரிகள் இடையேயான பேச்சுவார்த்தை நேர்மறையாகவும், தொழில் ரீதியாகவும் அமைந்தது. ஆப்கானிஸ்தான் சமூகத்தின் பல்வேறு அம்சங்களில் பெண்களின் பங்கேற்பு உள்ளிட்ட பாதுகாப்பு பிரச்சினைகள் மற்றும் மனித உரிமைகள் உள்ளிட்டவற்றில் இந்த பேச்சுவார்த்தை கவனம் செலுத்தியது. அதோடு ஆப்கான் மக்களுக்கு நேரடியாக மனிதாபிமான உதவிகளை அமெரிக்கா வழங்குவது குறித்து இரு தரப்பினரும் விவாதித்துள்ளோம். பேச்சுவார்த்தை சுமுகமாக அமைந்தாலும் தலீபான்களின் செயல்பாடுகள் மூலமாகவே அவர்களை மதிப்பிட முடியும், வார்த்தைகளால் அல்ல” என்பதை அமெரிக்கா மீண்டும் வலியுறுத்துவதாக தெரிவித்தார்.