கோவிலுக்குள் நுழைந்து அம்மன் நகையை கொள்ளையடித்து சென்ற மர்ம நபர்களை காவல்துறையினர் வலைவீசி தேடி வருகின்றனர்.
திருநெல்வேலி மாவட்டத்திலுள்ள அருகன்குளம் கிராமத்தில் மிகவும் சிறப்பு வாய்ந்த எட்டெழுத்துப் பெருமாள் கோவில் அமைந்துள்ளது. இந்நிலையில் மர்ம நபர்கள் சிலர் கோவிலின் பூட்டை உடைத்து உள்ளே நுழைந்து அங்கிருந்த பீரோவை உடைத்து அதிலிருந்த 2 கிராம் தங்க பொட்டு, 4 கிராம் தங்க சங்கிலி மற்றும் ரூ.50 ஆயிரம் மதிப்பிலான பொருட்களை திருடிச் சென்றுள்ளனர். இதனையடுத்து கோவிலுக்கு வந்த நிர்வாகி பரமசிவம் கோவிலின் பூட்டு உடைந்து கிடப்பதை கண்டு அதிர்ச்சியடைந்தார்.
அதன் பின் கோவிலின் உள்ளே சென்று பார்த்தபோது பீரோவில் இருந்த அம்மன் நகைகள் காணாமல் போயிருப்பதை கண்டு அதிர்ச்சியடைந்தார். இதுகுறித்து தாழையுத்து காவல்துறையினருக்கு தகவல் தெரிவித்துள்ளனர். அந்த தகவலின்படி சம்பவ இடத்திற்கு விரைந்து சென்ற காவல்துறையினர் அப்பகுதியில் உள்ள சிசிடிவி கேமராவில் பதிவான காட்சிகளை சோதனை செய்தனர். அதில் கோவிலுக்குள் புகுந்து 3 மர்மநபர்கள் நகைகளை கொள்ளையடித்து சென்றது தெரிய வந்துள்ளது. மேலும் இதுகுறித்து வழக்கு பதிவு செய்த காவல்துறையினர் நகைகளை கொள்ளையடித்து சென்ற மர்ம நபர்களை வலைவீசி தேடி வருகின்றனர்.